मेवा खाल्ला एकाने; जेलची हवा दुसऱ्यालाच

जळगाव : बनावट कागदपत्रे तयार करुन उज्ज्वला गॅस एजन्सीची डीलरशीप देण्याच्या नावाखाली कालिदास विलास सूर्यवंशी (वय ३३,रा.दहिगाव, ता.यावल) या तरुणाला १० लाख ३३ हजार रुपयांचा ऑनलाईन गंडा घालणारा मास्टरमाईंड वेगळाच असून पोलिसांनी अटक केलेले सुनीलकुमार सहानी ब्रह्मदेव ऊर्फ अनिलकुमार (वय ३८,रा.तेजपूर, बिहार) व कन्हैय्या कुमार सहानी राजेंदर सहानी (वय ४३, कोलकाता) हे तर मजुरी करणारे निघाले आहेत. मेवा खाणारा वेगळा तर जेलची हवा खाणारे वेगळेच निघाले आहेत.

आशितोष कुमार नाव सांगणाऱ्या व्यक्तीने कालिदास सूर्यवंशी यांना उज्ज्वला गॅस एजन्सीची डीलरशीप देतो असे सांगून खोटी कागदपत्रे तयार केली व ती एका वेबसाईटवर पाठवून वेगवेगळ्या कारणासाठी ए.यु.स्मॉल फायनान्स लि.या बँकेचा युपीआय आयडीद्वारे बारकोड स्कॅन करुन वेळोवेळी १० लाख ३३ हजार रुपये ऑनलाईन स्वीकारले होते. सायबर पोलिसांनी केलेल्या चौकशीत सुनीलकुमार सहानी व कन्हैय्याकुमार सहानी या शालक-मेहुण्याची जोडी निष्पन्न झाली. सीबीआय, पठाणकोठ पंजाब, झांशी पोलिसांनीही देखील यापूर्वी या दोघांना अटक केली आहे. गुन्ह्यात या दोघांच्या कागदपत्राचा वापर झालेला असला तरी प्रत्यक्षात आर्थिक फायदा हा दुसऱ्यालाच झाला असून ती व्यक्ती अद्यापही पोलिसांच्या हाती लागलेली नाही. अटकेतील दोघांना सोमवारी न्यायालयात हजर केले जाणार आहे.

अशी आहे गुन्ह्याची पद्धत

शहर, गावात मजुरी करणारे किंवा रस्त्यावर पाणीपुरी विक्री तसेच इतर व्यवसाय करणाऱ्यांना हेरुन त्यांच्याशी सलगी वाढविली जाते. त्यांच्याकडून वारंवार वस्तू खरेदी करणारे, किरकोळ मदत मिळवून सहानुभूती मिळविण्याचा प्रयत्न करुन या लोकांचे आधारकार्ड व इतर कागदपत्रे घेतली जातात. तुझ्या बँक खात्यावर पैसे मागवायचे आहे, असे म्हणत त्यांना किरकोळ पैसे दिले जातात. नंतर परस्पर ऑनलाईन पैसे काढले जातात. फसवणुकीचा गुन्हा दाखल झाला तरी कागदपत्रावर नावे असलेलेच अडकतील हा त्यामागचा उद्देश आहे. अशाच पद्धतीचा गुन्हा जळगावात महात्मा फुले मागासवर्गीय महामंडळाच्या योजनेत झालेला आहे.

कोट...

या गुन्ह्यात मुख्य आरोपी हा दुसराच आहे. फसवणुकीच्या पैशाचा फायदाही त्यालाच झालेला आहे. त्याचे अपूर्ण नाव मिळालेले आहे. अजून तरी शोध लागलेला नाही, परंतु पथक त्याच्या मागावर आहे.

-बळीराम हिरे, पोलीस निरीक्षक, आर्थिक गुन्हे शाखा