डागडुजीचे दीड लाख खड्डय़ात!

महापालिकेतर्फे शहरातील मुख्य रस्त्यांवरील खड्डय़ांची डागडुजी करण्यात आली असली तरी गणेश विसर्जनाच्या दिवशीच जोरदार पाऊस झाल्याने सर्वच रस्त्यांवरील डागडुजी उखडल्याने 'जैसे थे' परिस्थिती झाली आहे.

५0 लाखांची तरतूद

धुळे : गणेशोत्सवाच्या पार्श्‍वभूमीवर महापालिकेतर्फे शहरातील मुख्य रस्त्यांवरील खड्डय़ांची डागडुजी करण्यात आली होती. परंतु गणेश विसर्जनाच्या दिवशीच जोरदार पाऊस झाल्याने सर्वच रस्त्यांवरील डागडुजी उखडल्याने 'जैसे थे' परिस्थिती झाली आहे. यामुळे मात्र वाहनचालकांना मोठा त्रास सहन करावा लागत आहे. 

शहरातील रस्त्यांवरील खड्डय़ांचा प्रश्न नेहमीच ऐरणीवर राहिला आहे. पावसाळ्य़ापूर्वीच रस्त्यांची डागडुजी होणे आवश्यक असल्याने महापालिकेतर्फे निविदाही काढण्यात आली होती. 

परंतु त्याला प्रतिसाद न मिळाल्याने महापालिकेने स्वत: खड्डे बुजविण्याचे काम हाती घेतले होते. परंतु पावसामुळे शहरातील सर्वच रस्त्यांवर पुन्हा खड्डे निर्माण झाले. गणेशोत्सवामुळे मिरवणुका काढण्यात येणार्‍या मार्गावरील रस्त्यांची डागडुजी करणे आवश्यक होते. त्यानुसार मनपाने शहरातील आग्रा रोडसह मुख्य रस्त्यांवरील खड्डे खडी-मुरुमाच्या साहाय्याने बुजविले होते. गणेशोत्सवाच्या पार्श्‍वभूमीवर रस्त्यांवरील खड्डे बुजविण्यासाठी एक ते दीड लाखाचा खर्च करण्यात आला. परंतु दोन दिवस झालेल्या पावसामुळे पुन्हा खड्डे तयार झाले आहे. ठिकठिकाणी खड्डे असल्याने तो टाळताना वाहनचालकांचा तोल जाऊन लहान-मोठे अपघातही होत आहेत. शहरातील रस्त्यांची डागडुजी करण्यासाठी महापालिकेच्या अंदाजपत्रकात ५0 लाख रुपयांची तरतूद करण्यात आली आहे. तरीही खड्डे बुजविण्याचे काम वेळेत होत नसल्याने नागरिकांना मोठा त्रास सहन करावा लागतो. गणेशोत्सवाच्या पार्श्‍वभूमीवर शहरातील रस्त्यांवरील खड्डे खडी व मुरुमाने बुजविण्यात आले होते. यासाठी एक ते दीड लाखाचा खर्च झाला आहे. कायमस्वरूपी खड्डे बुजविण्याची कार्यवाही पावसाळा संपल्यानंतर लगेच केली जाणार आहे. 

-कैलास शिंदे, अभियंता, बांधकाम विभाग, मनपा