वाढदिवसाच्या दिवशीच उत्तरकार्याचा नेम

चाळीसगाव : सुदैवाची जशी वेगवेगळे रूपे असतात. तसेच दुर्दैवाचे फेरेही काळजाचे ठाव घेतात. या फेऱ्यांमध्ये जे अडकतात, त्यांच्यावर आभाळच कोसळते. होत्याचे क्षणार्धात नव्हते होऊन जाते. चाळीसगाव येथील शिक्षक राजेंद्र सूर्यवंशी यांच्या मृत्यूने दुर्दैवाचे हेच रूप दाखविले आहे. दि. १ जून रोजी त्यांच्या वाढदिवसाच्या दिवशीच त्यांचे उत्तरकार्य पार पडले. या दुर्दैवी योगामुळे अनेकांना अश्रू अनावर झाले होते.

टाकळी प्र.चा. भागातील शिवशक्तीनगरातील रहिवासी राजेंद्र चंद्रसिंग सूर्यवंशी (४३) हे राष्ट्रीय सह. शिक्षण प्रसारक मंडळाच्या माध्यमिक विद्यालयात शिक्षक म्हणून कार्यरत होते. त्यांना भटकंतीची विशेष आवड असल्याने ते ओघवत्या शब्दात विद्यार्थ्यांना प्रवास वर्णने ऐकवत. विद्यार्थीप्रिय शिक्षक असा ठसा त्यांनी उमटवला होता. वयाच्या ४३ वर्षी त्यांचे हृदयविकाराच्या तीव्र धक्क्याने निधन झाले. घरातील कर्तापुरुष त्यांच्या रूपाने हरविला आहे. त्यांच्या पश्चात मुलगा, मुलगी, आई-वडील, टाकळी प्र.दे. येथे शिक्षिका असणाऱ्या पत्नी सुरेखा सूर्यवंशी असा परिवार आहे.

........

चौकट

कोरोनापूर्वीची भ्रमंती ठरली शेवटची

सूर्यवंशी यांना भटकंतीची विशेष आवड होती. ऐतिहासिक स्थळांसोबतच ते पर्यटनस्थळीही आवर्जून जात. कोरोनाची लाट येण्यापूर्वीच ते प्रसन्न खंडाळे, जगन्नाथ निकम व खलाणे या शिक्षक मित्रांसमवेत राजस्थान परिसरात फिरावयास गेले होते. ही त्यांची अखेरची भ्रमंती ठरली. ते इंग्रजी विषयाचे माध्यमिक शिक्षक होते. त्यांचे वडील हेही सेवानिवृत्त मुख्याध्यापक आहेत.

.........

चौकट

वाढदिवसाच्या दिवशी फोटोला पुष्पहार

राजेंद्र चंद्रसिंग सूर्यवंशी यांना २८ मे रोजी अवस्थ वाटू लागले. ते दवाखान्यातही गेले. दुपारी १२ वाजता जेवण करून ते झोपले. ही झोपच त्यांच्यासाठी काळझोप ठरली. त्यांना झोपेतच हृदयविकाराच्या तीव्र धक्क्याने चिरशांत केले. पाचव्या दिवशी म्हणजेच १ जून रोजी त्यांचे उत्तरकार्य पार पडले. १ जून रोजी त्यांचा वाढदिवसही असायचा. वाढदिवसाच्या दिवशीच त्यांच्या फोटोला घातलेला पुष्पहार आणि समोर जळणारी अगरबत्ती पाहून अनेकांना हुंदका दाटून आला.

===Photopath===

010621\01jal_18_01062021_12.jpg

===Caption===

राजेंद्र सूर्यवंशी