आईची काळजी वाढली, काळजावर दगड ठेवून मुलांना पाठवितात शाळेत

स्टार ९३८

लोकमत न्यूज नेटवर्क

जळगाव : जिल्ह्यासह राज्यात १५ जुलैपासून इयत्ता आठवी ते बारावीचे वर्ग सुरू झाले असले तरी पालकवर्गात चिंतेचे वातावरण आहे. कोरोनाचा संसर्ग कमी झाला असला तरी तो काही प्रमाणात अजूनही असल्याने पाल्य शाळेत जात असताना आईची काळजी वाढली असून, काळजावर दगड ठेवून मुलांना शाळेत पाठवीत असल्याची प्रतिक्रियाही व्यक्त करण्यात येत आहे.

कोरोना विषाणूच्या प्रादुर्भावामुळे गत सात ते आठ महिन्यांपासून शाळा बंद होत्या. दिवाळीनंतर शाळा उघडल्या तरी त्या अल्पावधीसाठीच राहिल्या. नंतर दुसऱ्या लाटेत शाळा पूर्णत: बंद होत्या. मात्र, आता जी गावे कोरोनामुक्त आहेत, अशा गावांमध्ये राज्य शासनाच्या निर्देशानुसार आठवी ते बारावीचे वर्ग सुरू करण्यात आली आहेत. कोरोनाकाळात पाळले जाणारे नियम इमाने- इतबारे पाळली जात असल्याचे पालकांनी सांगितले.

शाळेतून घरी येताच कपडे बदला, अंघोळ करा

कोरोनाच्या दुसऱ्या लाटेत अनेकांनी आपले जवळचे नातेवाईक गमावले. अशा स्थितीत पाल्यांची काळजी घेणे अत्यंत महत्त्वाची बाब आहे. पाल्य शाळेतून घरी येताच पूर्ण कपडे बदलायचे, स्वच्छता ठेवायची किंबहुना अंघोळ करावी, असा उपक्रम सुरू झाला आहे. विशेष म्हणजे काळजी घेण्याच्या दृष्टिकोनातून पालकही हा सर्व खटाटोप करीत आहेत. याशिवाय वर्गात असताना कधीही मास्क काढू नये, तोंडाला वारंवार हाताचा स्पर्श होऊ नये, सोशल डिस्टन्सिंगचे पालन करावे, असे नियमही पाळले जात आहेत.

०००००००००००००००

काळजी आहे; पण शिक्षणही महत्त्वाचे आहे

मुलगी नववीत शिक्षण घेत आहे. पुढील वर्ष दहावीचे असेल. त्यामुळे कोरोनाचा प्रादुर्भाव असला तरी मुलीचे शिक्षण तेवढेच महत्त्वाचे आहे. शाळा बंद असल्यामुळे हवा तसा अभ्यास झाला नाही.

-माधुरी दुसाने

१५ जुलैपासून मुलगा नियमित शाळेत जात आहे. शाळेत जात असताना मुलाच्या बॅगेत सॅनिटायझर व अतिरिक्त मास्क ठेवून दिले जातात, तसेच गर्दीच्या ठिकाणी सोशल डिस्टन्सिंगचे पालन करावे, असे मुलाला सांगितले आहे.

-वैषाली महाजन

मुलगी दहावीला आहे. त्यामुळे हे महत्त्वाचे वर्ष आहे. ऑनलाइन शिक्षणामुळे अभ्यास अपूर्ण राहिला. प्रत्यक्ष शिक्षणामुळे नियमित अभ्यासाला सुरुवात होईल. आरोग्याच्या दृष्टीने मुलगी संपूर्ण नियमांचे पालन करते.

-रंजना पाटील

००००००००००

एकूण शाळा - ७०८

सुरू - ३०६

अद्याप बंद असलेल्या शाळा - ४०२