वाळू चढविताना तोल गेल्याने आठव्या मजल्यावरून मशीनसह पडून मजुराचा मृत्यू

जळगाव : मशीनच्या साहाय्याने वाळू वर चढवीत असताना तोल गेल्याने मशीनसह आठव्या मजल्यावरून पडून बांधकाम मजुराचा जागीच मृत्यू झाला. ही घटना शुक्रवारी दुपारी अडीच वाजेच्या सुमारास पोलीस वसाहतीत घडली़ मोहनलाल मुन्नीलाल (रा. झाशी) असे मयत मजुराचे नाव आहे.

पोलीस अधीक्षक कार्यालयाच्या परिसरातील पोलीस वसाहतीमध्ये कर्मचाऱ्यांसाठी घरांचे काम सुरू आहे. या ठिकाणी परराज्यातील शेकडो मजूर घर बांधण्याचे काम करीत आहेत. शुक्रवारी दुपारी मोहनलाल मुन्नीलाल हा मजूर आठव्या मजल्यावर एकटा मशीनच्या साहाय्याने वाळू चढवीत होता. वाळू चढवीत असताना मशीनचा तोल जाऊ नये म्हणून तिच्या खालच्या बाजूला असलेल्या अँगलवर वाळूच्या गोण्या ठेवल्या होत्या. दरम्यान, मोहनलाल हा त्या वाळूच्या गोणी बाजूला करून मशीनच्या साहाय्याने एकटाच वाळू वर चढवीत होता. त्याचवेळी अचानक तोल जाऊन मोहनलाल हा आठव्या मजल्यावरून खाली कोसळला.

डोक्याला गंभीर दुखापत झाल्याने जागीच मृत्यू

आठव्या मजल्यावरून खाली कोसळल्यामुळे मोहनलाल याच्या डोक्याला गंभीर दुखापत झाली. त्यामुळे त्याचा जागीच मृत्यू झाला. मजुराचा पडून मृत्यू झाल्याचे कळताच, बांधकाम ठेकेदारासह इतर कामगारांनी घटनास्थळी धाव घेतली होती. त्यानंतर त्याचा मृतदेह जिल्हा रुग्णालयात हलविण्यात आला.

डीवायएसपींसह पोलिस निरीक्षकांनी केली पाहणी

सहायक पोलिस अधीक्षक कुमार चिंथा, जिल्हापेठ पोलिस ठाण्याचे पोलिस निरीक्षक विलास शेंडे, पोलीस कर्मचारी करुणासागर जाधव, संजय पवार, आरपीआय सुभाष सोनवणे यांनी घटनास्थळी जाऊन पाहणी करीत घटनेची माहिती जाणून घेतली. त्यामुळे घटनास्थळी मजुरांची गर्दी झाली होती.

महिला बालंबाल बचावल्या...

मोहनलाल हा एकटाच आठव्या मजल्यावर वाळू चढविण्याचे काम करीत होता. दरम्यान, खाली काही महिला मजूर आपल्या मुलांसह बसल्या होत्या. त्यांच्यासमोरच आठव्या मजल्यावरून अवजड मशीन थेट खाली कोसळल्याने चिमुकले व त्या महिला बालंबाल बचावल्या, अन्यथा मोठी दुर्घटना घडली असती. वरच्या मजल्यावरून मशीन पडल्याने मशीनचे तुकडे-तुकडे झाले.