मुलीचे अपहरण फसले

जळगाव : जामनेर तालुक्यातील बेटावद गावातून एका १२ वर्षीय अल्पवयीन मुलीचे शनिवारी दुपारी एका व्हॅनमध्ये अपहरण करीत तिला रात्री ११ वाजेच्या सुमारास जळगावच्या नवीन बसस्थानकाजवळ सोडून दिल्याप्रकरणी जिल्हापेठ पोलिसात गुन्हा दाखल आहे. पोलिसांनी या प्रकरणात गावातीलच एका अल्पवयीन मुलाला ताब्यात घेतले आहे.

जामनेर तालुक्यातील बेटावद येथील १२ वर्षीय मुलगी शनिवारी दुपारी दीड वाजेच्या सुमारास गावातील एका किराणा दुकानावर जात होती. या ठिकाणी एका पांढर्‍या रंगाच्या चारचाकी वाहनात एका मुलाने मुलीला गाडीत ओढत बळजबरीने बसविले. त्यानंतर अपहरणकर्ता जामनेर व नेरीमार्गे मुलीला जळगावला घेऊन गेला. 

रस्त्यात या मुलाचा मोबाइल खाली पडल्याने तिने आपल्या वडिलांना फोन करून माहिती दिली. भेदरलेल्या मुलीने प्रथम आपण भुसावळला असल्याचे सांगितले. मुलीचा फोन आल्याने तिच्या कुटुंबीयांची भंबेरी उडाली. 

या मुलीला जळगाव स्थानकावर बसवून आरोपी बाहेर गेला. मुलीने बसस्थानकातील क्वॉईन बॉक्सवरून वडिलांना फोन करीत आपण जळगावला असल्याचे सांगितले. कुटुंबीयांनी तत्काळ जळगावला नोकरीस असलेल्या समाधान नावाच्या नातेवाइकाला फोन लावत बसस्थानकावर पाठविले. आपल्या अपहरणाची माहिती या मुलीने कंट्रोलरला दिली. त्यांनी तत्काळ पोलिसांना कळविले. 

अपहरणाची माहिती मिळाल्यानंतर जिल्हापेठ पोलीस तेथे पोहचले. याच दरम्यान समाधान आणि अपहरण करणारा आरोपी मुलगादेखील या ठिकाणी दाखल झाला. पोलिसांनी त्याला ताब्यात घेतले आहे.

पीडित मुलीच्या काकाने दिलेल्या फिर्यादीनुसार जिल्हापेठ पोलीस स्टेशनला अज्ञात आरोपीविरुद्ध अपहरणाचा गुन्हा दाखल केला. 

फूस लावून पळवून नेण्याचा प्रयत्न 

अल्पवयीन आरोपीने अल्पवयीन मुलीला गावातून फूस लावून पळवून नेले. मात्र भितीने या मुलीने त्याच्या मोबाइलवरून फोन करीत माहिती दिली.

त्यानंतर काहीवेळाने तिच्या वडिलांनी त्याच मोबाइलवर फोन केल्याने आरोपीने मुलीला बोलायला सांगत आम्ही भुसावळला असल्याचे बोलायला लावले. 

आरोपी हा व्हॅनचालक असून यापूर्वीही त्याने दोन-तीन मुलींसोबत प्रेमसंबंध जुळविल्याची चर्चा आहे. गाडीची तोडफोड पोलिसांनी महिला दक्षता समिती सदस्या अँड.शीला गोडबे यांच्यासमोर मुलीचा जबाब घेतला. उपनिरीक्षक व्ही.आर.शित्रे यांनी संशयित मुलाला ताब्यात घेतले. अल्पवयीन मुलीचे मुलाने अपहरण केल्याचे समजताच जामनेर पोलीस स्टेशनमध्ये गर्दी झाली. या वेळी बेटावद येथून आरोपीचे नातलगही जामनेरला आले होते. नातेवाइकांना आरोपीची व्हॅन रस्त्यावर लावलेली दिसली. काहींना ही माहिती मिळताच त्यांनी गाडीच्या काचा फोडल्या. पोलिसांनी वेळीच दखल घेतल्याने गाडीची अधिक तोडफोड झाली नाही. घटनेची माहिती मिळाल्यानंतर पोलीस निरीक्षक रफिफ शेख नंदुरबार येथून जामनेला दाखल झाले. शेख यांची नंदुरबार येथे सुरू असलेल्या पोलीस भरतीच्या ठिकाणी नियुक्ती होती.

---------

 

तपासाधिकारी विश्‍वास शित्रे यांनी या घटनेबाबत 'लोकमत'ला माहिती दिली. एकाच गावात राहणारे अल्पवयीन मुलगा व मुलगी हे शनिवारी दुपारी बेटावद येथून एका रिक्षाने वाडी किल्ला येथे आले. काही वेळ थांबल्यानंतर दोघे जामनेरला आले. या ठिकाणी या मुलाने आपल्या मित्रासाठी काही भांडे खरेदी केले. त्यानंतर बसने प्रवास करीत ते गाडेगावजवळ उतरले. मुलगा भांडे देण्यासाठी मित्राकडे गेला. या दरम्यान बालिकेच्या हातात या मुलाचा मोबाइल लागला. अर्धा तास या ठिकाणी थांबल्यानंतर दोघे एका बसने जळगावात आले. मुलाच्या सांगण्यानुसार मुलीने आपण भुसावलला असल्याचे फोनवरून कुटुंबीयांना सांगितले. त्यानुसार कुटुंबीय भुसावळला रवाना झाले. या दरम्यान बसस्थानकावर एका कोपर्‍यात या मुलीला बसवून मुलगा बाहेर गेला. एक ते दीड तास मुलगा न आल्याने मुलीने आपल्या वडिलांना फोन करून आपण जळगावला असल्याचे कळविले. मुलीच्या कुटुंबीयांनी नात्यातील एका तरुणाला बसस्थानकावर पाठविले. मुलीला नेमके काय झाले याबाबत चौकशी केल्यानंतर तिने आपले अपहरण झाल्याचे सांगितले. तोपर्यंत कुटुंबीयदेखील जळगावात दाखल झाले. हा अपहरणाचा प्रकार आहे की दोघे संमतीने बाहेर गेले याबाबतचा तपास सुरू असल्याचे शित्रे यांनी सांगितले.