जळगाव : पवन नगर येथील महिलेला घराचा दरवाजा उघडा ठेवून झोपणे महागात पडले आहे. घराचा दरवाजा उघडा असल्याची संधी साधत चोरट्यांनी महिलेच्या घरातून मंगळपोत व दोन मोबाईल असा एकूण ८ हजार ५०० रुपये किंमतीचा ऐवज लांबविल्याची घटना समोर आली आहे. याप्रकरणी तालुका पोलिस ठाण्यात गुन्ह्याची नोंद करण्यात आली आहे.
पवन नगर येथे आशा सुनील सावकारे ही महिला कुटूंबासह वास्तव्याला आहे. गुरूवारी मध्यरात्री सावकारे कुटूंब घराचा दरवाजा उघडा ठेवून घरामध्ये झोपले होते. मध्यरात्री १ ते ३ वाजेच्या दरम्यानात सोनवणे कुटूंबिय गाढ झोपेत असताना अज्ञात चोरट्याने त्यांच्या घरामध्ये प्रवेश करून महिलेची सोन्याची पोत आणि दोन मोबाईल असा एकूण ८ हजार ५०० किंमतीचा ऐवज चोरून नेला.
शुक्रवारी पहाटे हा प्रकार आशा सावकारे यांच्या लक्षात आला. त्यानंतर त्यांनी शुक्रवारी तालुका पोलिस ठाण्यात तक्रार दिल्यानंतर गुन्ह्याची नोंद करण्यात आली आहे. पुढील तपास बापू कोळी करीत आहे.