अवघ्या दहा महिन्यात ‘देवेश भय्या’ने पटकाविले १२ सुवर्णपदक

जळगावः कोरोना काळातील ऑनलाईन परिक्षांची संधी हेरत जळगावच्या देवेश भय्या या अवघ्या १२ वर्षाच्या विद्यार्थ्याने दहा महिन्यात भारताचे प्रतिनिधीत्व करीत आतंरराष्ट्रीय पातळीवरील विविध देशांमधील गणिताच्या परिक्षांमध्ये यशस्वी होत १२ सुवर्ण पदके प्राप्त केले आहे.

अमेरिकेतील जॉन हॉपकीन विद्यापीठाच्या सॅट जनरल मॅथ परिक्षेत देवेश भय्याने ८०० पैकी ८०० गुण मिळवित ‘ग्रँड ऑनर अ‍ॅवार्ड मेडल’ प्राप्त करीत १२ व्या वर्षी या विद्यापीठाच्या सेंटर फॉर टॅलेंट युथ मध्ये स्थान मिळविले आहे. थायलंड इंटर नॅशनल मॅथेमॅटिक्स ऑलम्पियाड, साऊथईस्ट एशियन मॅथेमॅटिक्स ऑलम्पियाड, इंटरनॅशनल मॅथेमॅटिक्स ऑलम्पियाड या तीनही परिक्षेत त्याने प्रथम वर्ल्ड रँक मिळवित सुवर्णपदके मिळविली. सिंगापूर अ‍ॅन्ड एशियन स्कूलमध्ये मॅथ्स ऑलम्पियाड, इंटरनॅशनल ज्युनियर मॅथ ऑलम्पियाड, हाँग काँग इंटरनॅशनल मॅथेमॅटिकल ऑलम्पियाड, इंटरनॅशनल मॅथ कांगारु कॉम्पिटिशन, सिंगापूर इंटरनॅशनल मॅथ्स ऑलम्पियाड चॅलेंज, साऊथ ईस्ट एशियन मॅथेमॅटिक्स ऑलम्पियाड एक्स नेक्स्ट लेव्हल या सहा परीक्षेत देवेशला ‘इंटरनॅशनल गोल्ड मेडल’ प्राप्त झाली आहे. या परिक्षांपैकी तीन परिक्षेत देवेशला ‘वर्ल्ड चॅम्पियन’ होण्याचा सन्मान देखील लाभला.

‘ऑनर’चा मिळाला बहूमान

वर्ल्ड इंटरनॅशनल मॅथेमॅटिकल ऑलम्पियाडमध्ये द्वितीय रँक तर आशिया इंटरनॅशनल मॅथेमॅटिक्स ऑलम्पियाडमध्ये तृतीय रँक (वर्ल्ड सेकंड रनर अप) हे स्थान प्राप्त करीत त्याने आणखी दोन सुवर्ण पदके पटकावली आहे. या बारा सुवर्ण पदकाशिवाय याच कालावधीत देवेशला अमेरिकन मॅथ कॉन्टेस्ट (इ.८ वी) मध्ये प्रथम रँक तर अमेरिकन मॅथ कॉन्टेस्ट (इ.१० वी) मध्ये ‘ऑनर’चा बहूमान मिळाला आहे. ऑस्ट्रेलियन मॅथ कॉन्टेस्टमध्ये त्याने ‘हायर डिस्टींग्शन’ तर पर्पल कामेंट मॅथ मीट २०२० चा तो ‘विजेता’ ठरला आहे.

‘अ‍ॅलन चॅम्प २०२० बेस्ट ब्रेन ऑफ इंडिया’ म्हणून देखील देवेशची निवड झाली आहे.

कोण आहे देवेश भय्या

देवेश हा एल.एच.पाटील इंग्लीश मिडीयम स्कूलमधील सातवीचा विद्यार्थी असून साने गुरुजी कॉलनी परिसरातील व्यंकटेश कॉलनीमधील रहिवासी आर्किटेक्ट पंकज भय्या व इंटेरियर डिझाईनर पल्लवी भय्या यांचा तो सुपूत्र आहे. गेल्या वर्षी देवेशला प्रधानमंत्री बालशक्ती पुरस्काराने राष्ट्रपती व पंतप्रधानाच्या उपस्थितीत दिल्लीत गौरविण्यात आले होते.