निरीक्षकांचे प्रमाणपत्र बोगस

मनपातील आरोग्य विभाग नेहमीच वेगवेगळ्या कारणांनी गाजत असतो. तसेच मनपातील कर्मचारी भरतीही नेहमीच बेकायदेशीर प्रक्रिया, बेकायदेशीर पदोन्नतीसाठी गाजत असते. आता त्यात आरोग्य निरीक्षकांच्या नियमानुसार मान्यता नसलेल्या बोगस विद्यापीठाच्या प्रमाणपत्रांच्या आधारे पदोन्नती मिळविण्याचा प्रकार उघडकीस आला आहे. अखिल भारतील सफाई मजदूर संघाचे जिल्हाध्यक्ष अजय घेंगट यांनी माहितीच्या अधिकारात या प्रमाणपत्रांबाबतची माहिती मागितली होती. त्यात हा प्रकार उघडकीस आला आहे. मनपा आरोग्य विभागात १७ आरोग्य निरीक्षक (सॅनीटरी इन्सपेक्टर) आहेत. यापैकी बहुतांश कर्मचारी हे मजूर, कुली, सफाई कामगार या पदावरून पदोन्नती मिळवून आले आहेत. त्यांनी पदोन्नती मिळविण्यासाठी या बोगस विद्यापीठाच्या पदव्यांचा वापर केल्याचे आढळून आले आहे. त्याच्या आधारे पदोन्नती मिळवून २५ हजारांच्या आसपास पगार घेत आहेत. ही फसवणूक असून जनतेच्या पैशांची लूट असल्याचा आरोप होत आहे. 

 

आरोग्य निरीक्षकांनी बोगस विद्यापीठाचे अथवा बनावट प्रमाणपत्र सादर करून आरोग्य निरीक्षक पदावर पदोन्नती मिळविली असल्याबाबतची लेखी तक्रार प्राप्त झाली आहे. त्याबाबत आस्थापना विभागाकडून सविस्तर अहवाल मागविला आहे. अहवाल प्राप्त झाल्यानंतर त्यात कुणी दोषी आढळल्यास संबंधीतांवर कारवाई केली जाईल. -अविनाश गांगोडे, उपायुक्त, मनपा 

 

अनेक प्रमाणपत्र बोगस विद्यापीठाचे तर काही बनावट आहेत. याबाबत मनपा उपायुक्त अविनाश गांगोडे यांना भेटून त्यांच्या निदर्शनास आणून दिले आहे. त्यांनी याबाबत आस्थापना विभागाकडे विचारणा केली आहे. काही चुकीचे आढळल्यास या आरोग्य निरीक्षकांना पदावनत केले जाईल, असे आश्‍वासन दिले आहे. - अजय घेंगट, जिल्हाध्यक्ष, सफाई मजदूर संघ