स्ट्रेचर न मिळाल्याने उचलून न्यावे लागले जखमीला

लोकमत न्यूज नेटवर्क

जळगाव : शासकीय वैद्यकीय महाविद्यालय व रुग्णालयात महिनाभरापूर्वीच नॉन कोविड सुविधा सुरू झाली आहे. मात्र, आपत्कालीन विभागात कमी बेड आणि स्ट्रेचरचा अभाव असल्याने काही गंभीर बाबी समोर येत आहेत. सोमवारी एका अपघातातील जखमी महिलेला स्ट्रेचर नसल्याने नातेवाईकांनी उचलून रुग्णालयात नेले तर विभागात बेड नसल्याने थेट खाली झोपविले. काही वेळाने स्ट्रेचर आणून महिलेला त्यावर ठेवण्यात आले.

दिवसेंदिवस रुग्णांची संख्या वाढत असताना शासकीय वैद्यकीय महाविद्यालयातील आपत्कालीन विभागात मात्र बेडची संख्या कमी असल्याने अनेक अडचणींचा सामना करावा लागत आहे. अचानक आपत्कालीन रुग्णांची संख्या वाढल्यास डॉक्टर, कर्मचाऱ्यांनाही पर्याय नसल्याने अडचणींचा सामना करावा लागत आहे. या ठिकाणी अतिदक्षता विभाग आणि त्यातील साहित्य यामुळे गोंधळ वाढल्याचे चित्र निर्माण झाले आहे. याचीच प्रचिती सोमवारी आली. आपत्कालीन विभागात जागा नसल्याने महिलेला थेट खाली झोपविण्यात आले होते.

काही महिलांना एक्सरे रूमच्या बाजूला असलेल्या कक्षात हलविण्यात आले होते. अचानक रुग्ण आल्याने या ठिकाणी गोंधळ वाढत असल्याचे चित्र निर्माण झाले आहे.

रोजची ओपीडी

४५०

रुग्णालयात उपलब्ध स्ट्रेचर

आपत्कालीन विभागात २ स्ट्रेचर, २ व्हीलचेअर

अतिदक्षता विभागात प्रत्येकी १

कोट

स्ट्रेचर पुरेसे आहेत. मात्र, आपत्कालीन विभागाच्या पॅसेजमध्ये गर्दी नको म्हणून तेथे कमी ठेवलेले असतात. गरज पडल्यास तातडीने अन्य कक्षातून आणले जातात. आपत्कालीन विभागात अधिक बेड वाढविण्यासाठी नियोजन सुरू असून लवकरच सिकलसेलचा विभाग हलवून त्या ठिकाणी दोन किंवा तीन बेड वाढवायचे आहेत.

- डॉ. जयप्रकाश रामानंद, अधिष्ठाता, शासकीय वैद्यकीय महाविद्यालय व रुग्णालय

फोटो २६ सीटीआर ०२