गृहिणींनो गॅस पेटवताना करा चारदा विचार

लोकमत न्यूज नेटवर्क

जळगाव : घरगुती गॅसच्या दरात पुन्हा एकदा वाढ झाली आहे. एप्रिल महिन्यापासून सलग तीन महिने गॅसचा दर स्थिर होता. मात्र आता पुन्हा केंद्र सरकारने गॅसचा दर वाढवला आहे. जळगाव जिल्ह्यात गॅसचा आता ८४० रुपये प्रति सिलिंडर एवढा दर आहे.

कोरोनाच्या काळात घरगुती इंधनाच्या दरात सातत्याने वाढ होत आहे. नोव्हेंबरमध्ये सहाशे रुपयांना मिळणारा १४ किलोचा एक सिलिंडर हा आता ८४० रुपयांना मिळणार आहे. त्यामुळे आधीच अडचणीत आलेल्या सामान्यांना महागाईचा फटका बसणार आहे. कोरोनाच्या काळात घरगुती इंधनाचा दर सातत्याने वाढत आहे. गेल्या एप्रिल महिन्यात इंधनाचा दर साडेपाचशे रुपयांच्या आसपास होता. त्यानंतर गेल्या काही नोव्हेंबरपासून आतापर्यंत दरात सातत्याने वाढ होत आहे.

सर्वात जास्त वाढ ही मार्च महिन्यात करण्यात आली होती. त्यात फेब्रुवारी महिन्यात ७२४.५० रुपये दराने गॅस मिळत होता. तर मार्च महिन्यात हाच दर ८२४.५० रुपये झाला. एकाच महिन्यात सरकारने या दरात १०० रुपयांची वाढ केली आहे.

आता पुन्हा चूल पेटवायची का?

सरकारने उज्ज्वला योजनेत सामान्यांसाठी गॅस कनेक्शन मोफत दिले. त्यानंतर गॅसचे दर वाढायला सुरुवात झाली. आधी गॅस सिलिंडरवर सबसिडी मिळत होती. नंतरच्या काळात ही सबसिडीदेखील बंद करण्यात आली. त्यामुळे ज्यांनी उज्ज्वला योजनेत गॅस कनेक्शन घेतले. त्यांच्या घरात आता पुन्हा चूल पेटवायची वेळ आली आहे. कारण गरीब घरांमध्ये ८४० रुपये दराने गॅस परवडेल कसा, असा प्रश्न उपस्थित होत आहे.

नोव्हेंबर २०२० - ५९९.५०

डिसेंबर २०२० - ६४९.००

जानेवारी २०२१ - ६९९.५०

फेब्रुवारी २०२१ - ७२४.५०

मार्च २०२१ - ८२४.५०

एप्रिल २०२१ - ८१४.५०

मे २०२१ - ८१४.५०

जून २०२१ - ८१४.५०

जुलै २०२१ - ८४०