शासनाच्या योजनेत ४७ लाखांची फसवणूक

फोटो

लोकमत न्यूज नेटवर्क

जळगाव : महाराष्ट्र राज्य कौशल्य विकास सोसायटीअंतर्गत प्रमोद महाजन कौशल्य व उद्योजकता विकास अभियान या योजनेत ४७ लाख रुपयांची फसवणूक केल्याच्या गुन्ह्यात स्थानिक गुन्हे शाखेच्या पथकाने दीपक नीळकंठ जावळे (२७, रा.नितीन साहित्यानगर, सुप्रीम कॉलनी) याला मंगळवारी अटक केली.

सूत्रांनी दिलेल्या माहितीनुसार, महाराष्ट्र राज्य कौशल्य विकास सोसायटीअंतर्गत प्रमोद महाजन कौशल्य उद्योजक विकास अभियानांतर्गत शैक्षणिक संस्था सुरू करून देण्यासाठी भूषण गणेश बक्षे (वय २७, रा.पार्वती काळेनगर, मोहाडी रोड, जळगाव) याने भारती गजेंद्रसिंग परदेशी (रा.रायपूर, ता.जळगाव) यांच्याकडून आवश्यक ते कागदपत्र घेतले व संस्थेची नोंदणी केली. या प्रशिक्षण संस्थेला मिळणारे ४७ लाखांचे शासकीय अनुदान परस्पर लाटून घेतले होते, अशा आशयाची तक्रार भारती परदेशी यांनी एमआयडीसी पोलीस ठाण्यात दिली होती. त्यानुसार, १ फेब्रुवारी, २०१९ रोजी भूषण गणेश बक्षे, शीतल भगवान पाटील, भरत अरविंद भंगाळे, मोहिनी भरत भंगाळे, राजेंद्र नरेंद्र नारखेडे व भगवान दगडू पाटील या सहा जणांविरुद्ध फसवणुकीचा गुन्हा दाखल झाला होता. यापैकी भूषण व शीतल या दोघांना अटक झाली होती, तर उर्वरित चौघांना औरंगाबाद खंडपीठाने अटकपूर्व जामीन मंजूर केला होता. दरम्यान, या गुन्ह्याची चौकशी करताना दीपक जावळे हाच संस्थेचे मुख्य व्यवहार हाताळत होता. सर्व महत्त्वाचे दस्तऐवज त्याच्या ताब्यात होते. त्यामुळे तपास अधिकारी संदीप पाटील यांनी जावळे याला या गुन्ह्यात आरोपी केले होते. या गुन्ह्यात प्रशिक्षण केंद्र चालविणाऱ्या, तसेच प्रशिक्षण केंद्रासाठी अर्ज केलेल्या काही महिला व पुरुषांची चौकशी करण्यात आली असून, त्यांचे जबाब नोंदवून घेण्यात आलेले आहेत. हा प्रकार उघडकीस आल्यापासून जावळे फरार होता. मंगळवारी त्याला अटक करण्यात आली.

गुन्हा आर्थिक गुन्हे शाखेकडे वर्ग

दरम्यान, मोठा आर्थिक व्यवहार असल्याने, हा गुन्हा आर्थिक गुन्हे शाखेकडे वर्ग करण्यात आला. या गुन्ह्याचे तपास अधिकारी उपनिरीक्षक संदीप पाटील यांचीही याच शाखेत योगायोगाने बदली झाली. त्यामुळे हा तपास त्यांच्याकडे सोपविण्यात आला. या गुन्ह्याची व्याप्ती अडीच कोटी रुपयांच्या घरात असून जळगाव शहराच्या बाहेरील प्रशिक्षण केंद्रेही चौकशीच्या फेऱ्यात असल्याचे पाटील यांनी सांगितले.