शिक्षणमंत्री जागे व्हा...जागे व्हा...

जळगाव : गेल्या दहा महिन्यांपासून बंद असलेली राज्यभरातील महाविद्यालये त्वरित सुरू करण्यात यावी, या मागणीसाठी अखिल भारतीय विद्यार्थी परिषदेच्यावतीने मंगळवारी सकाळी जिल्हाधिकारी कार्यालयासमोर आंदोलन करण्यात आले. शिक्षणमंत्री जागे व्हा, जागे व्हा...शिक्षणमंत्री कॅम्पस खोलो, उदय सामंत एक काम करो, खुर्ची छोडो आराम करो़..., शिक्षण आमच्या हक्काचं, नाही कुणाच्या बापाचं अशा जोरदार घोषणाबाजींनी अभाविपच्या कार्यकर्त्यांनी जिल्हाधिकारी कार्यालय परिसर दणाणून टाकला होता.

कोरोनाच्या प्रादुर्भावामुळे १७ मार्चपासून संपूर्ण महाराष्ट्रातील महाविद्यालये बंद आहेत. गेल्या शैक्षणिक वर्षाचे निकाल घोषित होऊन शैक्षणिक वर्ष २०२०-२०२१ साठी विद्यापीठाच्या विविध अभ्यासक्रमांसाठी प्रवेश प्रक्रिया पार पडली. विद्यार्थ्यांनी उच्च शिक्षणासाठी विविध महाविद्यालयात प्रवेश घेतला. साधारणपणे नोव्हेंबर किंवा डिसेंबर महिन्यात महाविद्यालये प्रत्यक्षपणे सुरू होतील अशी अपेक्षा होती. पण, महाविद्यालये सुरू झाली नाहीत. ऑनलाईन शिक्षणात विद्यार्थ्यांना अनेक अडचणींचा सामना करावा लागत आहे. राज्य सरकारद्वारे मद्याची दुकाने, मॉल, सिनेमागृह व परिवहन सेवा आणि राज्यातील इयत्ता पाचवी ते बारावीच्या शाळा सुरु केल्या आहे, मग महाविद्यालय बंद का? असा प्रश्न उपस्थित करीत अखिल भारतीय विद्यार्थी परिषदेच्यावतीने महाविद्यालय उघडा आंदोलन मंगळवारी केले.

यांचा होता आंदोलनात सहभाग

सकाळी ११ वाजता जिल्हाधिकारी कार्यालयासमोर अभाविपच्या आंदोलनाला सुरूवात झाली होती. हातात फलक घेऊन विद्यार्थ्यांनी जोरदार घोषणाबाजी केली. या आंदोलनात अभाविप जळगाव महानगर मंत्री आदेश पाटील, जिल्हा संयोजक रितेश चौधरी, सहमंत्री कल्पेश पाटील, आंदोलन प्रमुख संकेत सोनवणे, हेमांगिनी पाटील, गौरवी चौधरी, भूमिका कानडे, चिराग तायडे, शुभम शुक्ला, रितेश महाजन, जितेश चौधरी, चैतन्य बोरसे, मयूर अलकरी, ऋतिक माहुरकर, नितेश चौधरी आदी कार्यकर्ते उपस्थित होते.