सुरेशदादा जैन यांच्या विक्रमाविषयी उत्सुकता

आमदार सुरेशदादा जैन हे सलग १0 वी विधानसभेची निवडणूक लढण्यासाठी आखाड्यात उतरले असून विजयी होऊन ते विक्रम प्रस्थापित करतात का? याकडे जिल्ह्यासह संपूर्ण राज्याचे लक्ष लागून आहे.

विकास पाटील￭ जळगाव

आमदार सुरेशदादा जैन हे सलग १0 वी विधानसभेची निवडणूक लढण्यासाठी आखाड्यात उतरले असून विजयी होऊन ते विक्रम प्रस्थापित करतात का? याकडे जिल्ह्यासह संपूर्ण राज्याचे लक्ष लागून आहे. 

२0१४ ची विधानसभेची निवडणूक वैशिष्ट्यपूर्ण आहे. या वेळी जळगाव शहर विधानसभा मतदारसंघात एकूण १७ उमेदवार रिंगणात असून पहिल्यांदाच पंचरंगी लढत होत आहे. युतीचा घटस्फोट आणि आघाडीची बिघाडी झाल्याने काँग्रेस, राष्ट्रवादी काँग्रेस, भाजपा आणि शिवसेनेचे उमदेवार स्वतंत्रपणे निवडणूक लढत आहेत. 

पंचरंगी लढत 

शिवसेनेतर्फे आमदार सुरेशदादा जैन, भाजपातर्फे सुरेश भोळे, काँग्रेसतर्फे डॉ.राधेश्याम चौधरी, राष्ट्रवादीतर्फे मनोज चौधरी आणि मनसेतर्फे ललित कोल्हे निवडणूक लढवित आहेत. राष्ट्रवादीचे माजी नगरसेवक इब्राहिम पटेल यांनी बंडखोरी केली असून ते समाजवादी पक्षातर्फे लढत आहेत. अशा प्रकारे शहरात पंचरंगी लढत आहे. 

तीन लेवा पाटील उमेदवार

या पाच उमेदवारांमध्ये लेवा पाटील समाजाचे सुरेश भोळे, मनोज चौधरी आणि ललित कोल्हे हे तीन उमेदवार आहेत. पहिल्यांदाच लेवा पाटील समाजाचे तीन उमेदवार रिंगणात असल्याने मतांचे विभाजन होण्याची शक्यता आहे. 

१९९९ मध्ये स्वतंत्र लढले

यापूर्वी १९९९ मध्ये झालेल्या विधानसभा निवडणुकीत काँग्रेस, राष्ट्रवादी काँग्रेस स्वतंत्र लढली होती. त्या वेळी सेनेकडून सुरेशदादा जैन हे विजयी झाले होते. तेव्हा सुरेशदादा यांना ६३ हजार ९६४, तर काँग्रेसचे उमेदवार डॉ.अर्जुन भंगाळे यांना ४१ हजार २८0 आणि राष्ट्रवादीचे उमेदवार प्राचार्य काशिनाथ राघो सोनवणे यांना ६ हजार ३२७ मते मिळाली होती. 

महापालिकेत खाविआच

या वेळी काँग्रेस व राष्ट्रवादी यांच्यासह भाजपा व सेनाही स्वतंत्र लढत आहे. वर्षभरापूर्वी झालेल्या महापालिका निवडणुकीत खान्देश विकास आघाडीच्या विरुद्ध भाजपा, काँग्रेस, राष्ट्रवादी, मनसे लढली. मात्र जनतेने खाविआलाच कौल दिला. त्यानंतर झालेल्या लोकसभा निवडणुकीत जळगावकरांनी युतीच्या उमेदवाराला मताधिक्य दिले. आता भाजपा, सेनेचे स्वतंत्र उमेदवार आहेत. त्यामुळे मताधिक्य कुणाला मिळते याकडे लक्ष लागून आहे. 

---------

सुरेशदादांची विक्रमाकडे वाटचाल

१९८0 पासून आमदार सुरेशदादा जैन हे मोठय़ा मताधिक्याने निवडून येत आहेत. २0१४ ची निवडणूक ही त्यांची १0 वी विधानसभेची निवडणूक आहे. घरकूलप्रकरणी ते कारागृहात असून तेथून ते निवडणूक लढत असून त्यांच्या प्रचाराची धुरा त्यांचे पुत्र राजेश जैन आणि त्यांचे बंधू रमेशदादा जैन सांभाळत आहेत. कुणावरही आरोप प्रत्यारोप न करता संयमाने प्रचार सुरू आहे.

आमदार सुरेशदादा यांनी या वेळीही बाजी मारल्यास विक्रम प्रस्थापित होणार आहे. पंचरंगी लढत असली तरी त्यांच्याविरुद्ध तगडा उमेदवार नाही. राष्ट्रवादी काँग्रेसचे मनोज चौधरी यांनी गतवेळी सुरेशदादा यांच्याविरुद्ध अपक्ष म्हणून निवडणूक लढविली होती. मात्र त्यांना अपयश आले होते. आता ते पुन्हा एकदा नशीब अजमावत आहेत.

 ----------

प्रचार जोरात

सर्वच प्रमुख राजकीय पक्षांकडून जोमाने प्रचार सुरू झाला आहे. कॉर्नर मीटिंग, प्रचारफेरी, जाहीर सभांचा धडाका सुरू झाला आहे. भाजपातर्फे आतापर्यंत खासदार नंदकुमार चौहान आणि स्मृती इराणी यांची जाहीर सभा घेण्यात आली असून येत्या काही दिवसात उद्धव व आदित्य ठाकरे यांची शहरात सभा होणार आहे.