गायीची चोरी; मायलेक झाले पोरके

हरताळा, ता. मुक्ताईनगर : पेरण्या ऐन तोंडावर आल्या असता येथील बसस्थानकाजवळील जलकुंभालगतच असलेल्या खळ्यातून धोंडू बाबूराव चोपडे यांच्या मालकीचा एक गोऱ्हा व भारत बाबूराव चोपडे यांच्या मालकीच्या गायीची सोमवारी रात्री चोरी झाली. विशेष म्हणजे पाच दिवसांपूर्वी ही गाय व्यालेली होती. वासराची माय पोरकी झाल्यामुळे हळहळ व्यक्त होत आहे.

पशुपालकांवर संकट

पेरण्या तोंडावर असताना त्यातच पशुपालकांवर मोठे संकट कोसळले आहे. यापूर्वीदेखील चोरीला पशुधन जाण्याच्या घटना घडत असल्याचे पशुपालकांनी सांगितले. लॉकडाऊनमध्ये चोरट्यांचे भले होत असून, पोटच्या गोळ्यापेक्षाही जिवापाड प्रेम करणारे पशुधन चोरी होत असल्याने नाराजी व्यक्त होत आहे.

नेहमी चोरीच्या घटना या ठरलेल्या आहेत. मागील वर्षीदेखील अशाच लॉकडाऊनच्या काळात दोन म्हशी व एकाची बैलजोडी चोरीला गेली होती. त्यांचाही शोध लागला नसल्याचे त्यांनी सांगितले.

गुरांचे बाजारही बंद

ऐन पेरणीच्या तोंडावर पशुधन चोरीला जात आहे. त्यात गुरांचे बाजारही बंद आहेत. त्यात गुपित व्यवहार करण्यासाठी भुरट्या चोरट्यांना चांगलेच फावत आहे. चोरट्यांचा छडा लावण्यासाठी प्रयत्न व्हावे, अशी अपेक्षा पशुपालकांसह गावकऱ्यांकडून व्यक्त होत आहे.

सीसीटीव्ही कॅमेरे बनले शोभेची वस्तू

गावाच्या मुख्य ठिकाणी सीसीटीव्ही कॅमेरे बसविले असून तेही शोभेची वस्तू ठरत असल्याचा आरोप ग्रामस्थांनी केला आहे. पशुधन चोरीला जात असल्यामुळे यात तथ्य असल्याचा आरोपही केला जात आहे.

चोरी रोखण्यासाठी लोकसहभाग आवश्यक

गावाच्या दर्शनी भागात जवळच असलेल्या ठिकाणी चोरीच्या घटना घडत आहेत. चोरट्यांना आळा बसण्यासाठी लोकसहभागासह गस्त घालण्यात यावी, अशी अपेक्षा व्यक्त होत आहे.

गाय-वासरू पोरके

चोरीला गेलेल्या गायीने पाच दिवसांपूर्वी येथील गोठ्यात एका वासरीला जन्म दिला होता. रात्रीच्या घटनेने पाच दिवसांच्या वासरीवर निर्दयी भुरट्या चोरांनी घाला घातल्यामुळे माय-लेकींना एकमेकींना पोरक्या झाल्या आहेत.