बोदवड येथे रिपब्लिकन पार्टीतर्फे रास्ता रोको

शहरातील जामनेर रोडवरील रस्त्याचे काम सुरू असून, या रस्त्यावर डॉ.बाबासाहेब आंबेडकर यांचा पुतळा आहे. रस्त्याचे काम सुरू असल्याने पुतळ्याचे सुशोभीकरणाचे नुकसान होण्याची शक्यता असून भविष्यात पुतळ्याची विटंबना होऊ शकते. त्यामुळे संपूर्ण आंबेडकरी चळवळीतील अनुयायांच्या भावना दुखावल्या जाण्याची शक्यता आहे. भविष्यात असला अनुचित प्रकार घडू नये यासाठी संबंधित रोड ठेकेदार, प्रशासन प्रमुख म्हणून तहसील व रिपब्लिकन पार्टीचे पदाधिकारी यांची संयुक्त बैठक घेऊन कामाची रूपरेषा आखावी, अशी मागणी रिपब्लिकन पार्टी आठवले गटाचे वतीने व्यक्त करण्यात आली होती. मात्र, असे न झाल्याने १४ रोजी दुपारी डॉ. आंबेडकर पुतळ्यासमोर जिल्हाध्यक्ष राजू सूर्यवंशी यांच्या उपस्थितीत रास्ता रोको आंदोलन करण्यात आले. जोपर्यंत आंबेडकरी चळवळीतील कार्यकर्ते यांना सन्मानपूर्वक संबंधित ठेकेदार, तहसीलदार यांची बैठक घेऊन पुढील कामाची रूपरेषा आखली जात नाही, तोपर्यंत रोडाचे काम आम्ही होऊ देणार नाही, असा पवित्रा रिपब्लिकन पार्टी (आठवले गट)ने घेतला आहे.

प्रशासनाला निवेदन देताना राजू सूर्यवंशी, तालुकाध्यक्ष संजय तायडे, तालुका युवाध्यक्ष सदानंद वाघ, राजू इंगळे, युवराज तायडे, गौतम निकम, ईश्वर तायडे, सुरेश तायडे, रूपेश मेढे, नितीन सुरवाडे, विश्वास बोदडे, सुनील बोदडे, शेख मुसा शेख इसा, प्रभाकर वाघ, शेख लुकमान उपस्थित होते.