भुसावळात सशस्त्र दरोड्याचा प्रयत्न फसला

भुसावळ : शहरात तलवार, चेन व चाकूच्या धाकावर जबरी चोरी करण्याच्या प्रयत्नात असलेल्या तिघा चोरट्यांच्या शहर पोलिसांनी मुसक्या आवळल्या. ताब्यात घेतलेल्या संशयितांपैकी एक अल्पवयीन असून शहर पोलिसात याप्रकरणी गुन्हा दाखल करण्यात आला आहे.

तापी पुलावर मंगळवारी रात्री काही संशयित जबरी चोरीच्या उद्देशाने आल्याची माहिती शहर पोलीस ठाण्याचे निरीक्षक बाबासाहेब ठोंबे यांना मिळाली. त्यांनी सहाय्यक फौजदार मोहंमदअली सैयद, इकबालअली सैयद, हेडकॉन्स्टेबल सुपडा पाटील आणि कॉन्स्टेबल सचिन काटे यांना तापी पुलावर कारवाईसाठी पाठविले. यावेळी पोलिसांनी पुलाच्या दोन्ही बाजूस उभे असलेल्या लोकांची तपासणी केली. पोलिसांनी आणखी पुढे जाऊन तपासणी केली. त्यात पुलाजवळ काळ्या रंगाची मोटारसायकल (एमएच-१९-डीआर-५१५०) जवळ उभ्या असलेल्या तीन तरुणांपैकी दोन मुले अचानक फैजपूरच्या दिशेने पळू लागले, तर एक मुलगा मोटारसायकल सुरू करून पळू लागला. तेव्हा पोलिसांनी पाठलाग करून त्यांना पकडले. त्यांच्याकडे तलवार, लोखंडी चेन आणि चाकू आढळला. यावेळी पोलिसांनी शुभम शेखर पाटील (वय १८, रा. अकलूज, ता.यावल), रा. रामचरण गुप्ता (वय १९, रा. अकलूज, ता. यावल), तर पाडळसा, ता. यावल येथील एक अल्पवयीन मुलगा अशा तिघांच्या मुसक्या आवळल्या.

पोलिसांनी केलेल्या चौकशीत हे तिन्ही जण चोरी करण्यासाठी भुसावळात येत असल्याचे सांगण्यात आले. जाकीर हारून मन्सुरी यांनी दिलेल्या फिर्यादीनुसार संशयितांविरोधात शहर पोलिस ठाण्यात गुन्हा दाखल करण्यात आला आहे.