आईला हिनवल्याचा संताप, तलवारीने वार करून एकाचा खून ...

रावेर : आरोपीला तीन दिवसांची पोलीस कोठडी

रावेर : शहरातील संभाजीनगर भागात शेजारच्याने आईला हिणवल्याचा राग आल्याने संतापात एकाने थेट तलवारीने डोक्यावर वार करून सोमवारी रात्री जीवे ठार मारण्याचा प्रयत्न केला होता. दरम्यान, मंगळवारी जळगाव येथील एका खासगी रुग्णालयात औषधोपचार सुरू असताना त्या जखमी इसमाचा मृत्यू झाला असून, एकच खळबळ उडाली आहे. रावेर पोलिसात संबंधित आरोपींवरील जीवे ठार मारण्याचा प्रयत्न केल्याप्रकरणी दाखल गुन्ह्यात खुनाच्या कलमाची वाढ करण्यात येणार असून, रावेर न्यायालयाने सदर आरोपीस तीन दिवसांची पोलीस कोठडी सुनावली आहे.

शहरातील संभाजीनगर भागात वास्तव्यास असलेले भाजीपाला विक्रेता राजू देवराम चौधरी (५५) हा आपल्या आईला घोडा बोलून हिणवत असल्याचा राग आल्याने आरोपी रवींद्र संतोष मराठे याने थेट तलवारीने राजू देवराम चौधरी यांच्या डोक्यात वार करत गंभीर जखमी करून जीवे ठार मारण्याचा प्रयत्न केला होता. ही घटना सोमवारी रात्री १०: ४५ वाजताच्या सुमारास जखमी राजू देवराम चौधरी यांच्या घरासमोर घडली होती. रक्तबंबाळ झालेल्या जखमी राजू देवराम चौधरी यांच्यावर रावेर ग्रामीण रुग्णालयात औषधोपचार करून जळगाव येथील खासगी रुग्णालयात दाखल करण्यात आले होते.

दरम्यान, जळगाव येथे मेंदूवर शस्त्रक्रिया करून औषधोपचार सुरू असताना जखमी राजू देवराम चौधरी यांचा दुर्दैवी मृत्यू झाल्याची खबर मंगळवारी दुपारी ४ वाजता समजल्याने शहरात एकच खळबळ उडाली आहे.

मयताचा भाऊ गणेश देवराम चौधरी रा. संभाजीनगर यांनी सोमवारी रात्री उशिरा दिलेल्या फिर्यादीवरून रावेर पोलिसात गुन्हा दाखल केला आहे.

आरोपी रवींद्र संतोष मराठे यास रावेर पोलिसांनी मंगळवारी पहाटे तीन वाजता अटक करून रावेर न्यायालयासमोर हजर केले होते. न्या. ए. एच. बाजड यांनी सदर आरोपीस तीन दिवसांची पोलीस कोठडी सुनावली आहे.

घटनास्थळी फैजपूर पोलीस उपअधीक्षक नरेंद्र पिंगळे, रावेर पोलीस स्टेशनचे पोलीस निरीक्षक रामदास वाकोडे, सहायक पोलीस निरीक्षक शीतलकुमार नाईक, फौजदार मनोज वाघमारे, मनोहर जाधव, अनिस शेख यांनी घटनास्थळी भेट देऊन पंचनामा केला आहे. खुनाच्या वार्तेने शहरात एकच खळबळ उडाली असून, संभाजीनगर भागात पोलीस बंदोबस्त तैनात करण्यात आला आहे.