अंबड (जालना): शिराढोण गावच्या शिवारात एका ६० वर्षीयशेतकऱ्याचा मृतदेह आढळून आल्याने खळबळ उडाली आहे. मच्छिंद्र गंगाधर सपकाळ ( रा. शिराढोण तालुका अंबड, हल्ली मुक्काम अंबड) असे मृताचे नाव असून पोलिस पुढील तपास करत आहेत. ही घटना बुधवारी मध्यरात्री उघडकीस आली.
अंबड येथील रहिवाशी मच्छिंद्र सपकाळ यांची शिराढोण येथे शेती आहे. बुधवारी सायंकाळी ते शेतातील काम आटोपून अंबड येथील घराकडे परत निघाले. मात्र, रात्री उशीर झाला तरीही ते घरी परतले नाही. यामुळे नातेवाइकांनी त्यांचा लागलीच शोध सुरू केला. अंबड ते शिराढोणकडे मार्गावर शोध घेत असताना नातेवाइकांना रात्री उशिरा शिराढोण शिवारातील पाणंद रस्त्यावर सपकाळ यांचा मृतदेह आढळून आला. सपकाळ यांचा चेहरा लाकडी ओंडक्याच्या सहाय्याने ठेचल्याचे निदर्शनास आले.
माहिती मिळताच उपविभागीय पोलीस अधिकारी विशाल खांबे, पोलीस निरीक्षक सतीश जाधव, पोलीस उपनिरीक्षक गुरले, नरोडे यांनी घटनास्थळी भेट दिली. त्यानंतर उत्तरीय तपासणीसाठी मृतदेह अंबड येथील उपजिल्हा रुग्णालयात दाखल करण्यात आला. या प्रकरणी मृताच्या मुलाने दिलेल्या फिर्यादीवरून अंबड पोलीस ठाण्यात गुन्हा नोंदविण्यात आला आहे. पुढील तपास पोलीस निरीक्षक सतीश जाधव करत आहेत.