लोकमत न्यूज नेटवर्कवडीगोद्री : दोन महिन्यांपूर्वी औरंगाबाद - सोलापूर मार्गावरील कोळीबोडखा परिसरात रिक्षा व ट्रक चालकाला मारहाण करून लुटले होते. या प्रकरणातील एका आरोपीचा मृतदेह पोलिसांना सापडला असून, स्थानिक गुन्हे शाखेसह अन्य वरिष्ठ पोलीस अधिकाऱ्यांनी नालेवाडी शिवारात गुरूवारी रात्री घटनास्थळी धाव घेतली. त्यावेळी हा मृतदेह आढळून आल्याचे सांगण्यात आले.२१ मार्च रोजी शीतपेयांचा व्यवसाय करणा-या इस्माईल पिंजारी हे कोळीवाडा परिसरात रिक्षासह थांबले होते. त्यावेळी परिसरात लपून बसलेल्या तीन ते चार दरोडेखोरांनी इस्माईल पिंजारी यांना तलवारीचा धाक दाखवून त्यांच्याकडील रोख १० हजार रूपये आणि मोबाईल लंपास केला. याच परिसरात उभ्या असलेल्या ट्रक चालकाला लुटण्याचा प्रयत्न दरोडेखोरांनी केला. परंतू, ट्रक चालकाने प्रसंगावधान राखून ट्रक भरधाव चालविला. यामध्ये चार दरोडेखोरापैकी एक दरोडेखोर यात गंभीर जखमी झाला होता. त्याच्या शरीराचे अवशेषही त्या भागात आढळून आले होते.प्रारंभी इस्माईल पिंजारी यांच्या तक्रारीवरून गोंदी पोलीस ठाण्यात गुन्हा नोंद करण्यात आला होता. श्वानपथक घटनास्थळी दाखल करून पोलिसांनी आरोपीचा माग काढण्याचा प्रयत्न त्यावेळी केली. परंतु, शरीराच्या अवशेषाशिवाय पोलिसांच्या हाती काहीच लागले नव्हते. दरम्यान, गुरुवारी स्थानिक गुन्हे शाखेला मिळालेल्या माहितीनुसार पोलीस निरीक्षक राजेंद्रसिंग गौर यांनी घटनास्थळी भेट देऊन खोदकाम केले असता तेथून एकाचा मृतदेह ताब्यात घेण्यात आला. हा मृतदेह त्या लूट प्रकरणातील आरोपीचाच असावा असा प्रथमदर्शी अंदाज वर्तविला जात आहे. याची माहिती गौर यांनी पोलीस उपविभागीय अधिकारी रमेश सोनवणे, तहसीलदार दत्तात्रय भारस्कर आणि वैद्यकीय अधिका-यांना कळविले. सापडलेल्या मृतदेहाच्या मांडीचे हाड आणि रक्ताचे नमुने घेऊन ते डीएनए तपासणीसाठी पाठविण्यात येणार असल्याचे सांगण्यात आले.
‘त्या’ आरोपीचा मृतदेह आढळला
By लोकमत न्यूज नेटवर्क | Updated: May 11, 2018 01:17 IST