भोकरदन ( जालना ) : दोन मोटर सायकलची समोरासमोर धडक होऊन झालेल्या अपघातात तिघेजण जागीच ठार झाल्याची घटना सोमवारी रात्री आठ वाजेच्या सुमारास तालुक्यातील हसनाबाद खादगाव फाटीजवळ घडली. शेरु पठाण, जुबेर पठाण, अशोक कडूबा जाधव असे मयताचे नाव आहे. तर अन्य दोघेजण गंभीर जखमी आहेत.
३१ डिसेंबर रोजी रात्री ८ वाजेच्या दरम्यान शेरखॉ महम्मदखॉ पठाण (५६) व त्यांचा मुलगा जुबेरखॉ शेरखॉ पठाण (२८) हे औरगाबाद येथून दुचाकीवर ( एम.एच. २१, ००८५ ) हसनाबादकडे येत होते. तर योगेश कडुबा जाधव (२५) योगेश काकासाहेब मानकापे (२४) आणि रवी बन्सीधर मते (२०) ( तिघेही रा. जातेगाव ता़ फुलब्री) हे एकाच दुचाकीवर ( एमएच २० ई.एक्स १६९८ ) फुलंब्रीकडे सुसाट जात होते. हसनाबाद ते तळेगावच्या मार्गावर असलेल्या खादागाव फाटीजवळ या दोन्ही दुचाकीची समोरासमोर जोराची धडक झाली.
या भीषण अपघातात शेरखॉ महम्मदखॉ पठाण व त्याचा मुलगा जुबेरखॉ शेरखॉ पठाण हे दोघे बापलेक डोक्याला जबरदस्त मार लागल्याने जागीच ठार झाले. तर यावेळी गंभीर जमखी असलेल्या योगेश कडूबा जाधव याचा हसनाबाद येथील प्राथमिक उपचार केंद्रात उपचारादरम्यान मृत्यू झाला. तर अन्य दोघेजण गंभीर जखमी आहेत. अपघाताची माहिती मिळताच ग्रामस्थ आणि हसनाबाद पोलिसांनी जखमींना तातडीने हसनाबाद येथील प्राथमिक आरोग्य केंद्रात दाखल केले होते. मात्र प्रकृती गंभीर असल्याने त्यांना पुढील उपचारासाठी औरंगाबाद येथील शासकीय रुग्णालय (घाटी) येथे हलविण्यात आल्याची माहिती पोलिसांनी दिली.