गोंदी (जालना) : धावत्या ट्रॅक्टरमधून तोल जाऊन खाली पडल्याने चालकाचा जागीच मृत्यू झाल्याची घटना अंबड तालुक्यातील गोंदी- हसनापूर रस्त्यावर बुधवारी सकाळी उघडकीस आली. प्रदीप रामचंद्र नाहिराळे (वय- ३१, रा. अंकुशनगर येथील दिशनगरी) असे मयताचे नाव आहे.
प्रदीप नाहिराळे हे चालक असून बुधवारी पहाटे ते ट्रॅक्टरला ( क्र. एम. एच- २० एडी.- ४१६५) उसाने भरलेल्या दोन ट्रॉली घेऊन साडेगाव शिवारातून अंकुशनगर येथील समर्थ सहकारी साखर कारखान्यावर घेऊन चालले होते. हसनापूर फाट्याजवळ प्रदीपचे ट्रॅक्टरवरील नियंत्रण सुटले व तो खाली कोसळला. याचवेळी ट्रॉलीचे चाक त्याच्या डोक्यावरून गेले व पुढे जाऊन ट्रॅक्टर उलटला. डोक्यावरून चाक गेल्याने प्रदीपचा जागीच मृत्यू झाला. बुधवारी सकाळी या ठिकाणी मॉर्निंग वॉकसाठी आलेल्या नागरिकांना ही घटना निदर्शनास आली. त्यांनी गोंदी पोलीस ठाण्याला याची माहिती दिली.