भोकरदन: सहा दिवसांपूर्वीच गावी सुटीवर आलेल्या सैन्य दलातील जवानाचा अपघाती मृत्यू झाल्याची घटना तालुक्यातील केदारखेडा परिसरात येथे शुक्रवारी रात्री ९ वाजता घडली. गजानन वामन नवल (35) असे मृत जवानाचे नाव आहे.
याबाबत अधिक माहिती अशी की, तालुक्यातील वाडी खु येथील गजानन वामन नवल हे सैन्य दलात राजस्थान येथे कर्तव्यावर होते. 6 एप्रिल रोजी 20 दिवसांच्या सुटीवर ते गावाकडे आले. शुक्रवारी रात्री 9 वाजेच्या दरम्यान दुचाकीवर राजूरकडून भोकरदनकडे येत असताना भोकरदनकडून राजूरकडे जाणाऱ्या एका भरधाव ट्रकने त्यांच्या दुचाकीला जोरदार धडक दिली. यात नवल यांचा जागीच मृत्यू झाला. त्यांच्या पश्चात आई, पत्नी व दोन वर्षांचा एक मुलगा असा परिवार आहे. एकमेव कर्त्या पुरुषाचा मृत्यू झाल्याने कुटुंब उघड्यावर पडले आहे.