नवी दिल्ली : लहानपणीपासून अलीना आणि अलिस्मा दोघेही एकत्रच वाढल्या, शाळेतही एकत्रच जात होत्या, प्रत्येक काम दोघी मिळूनही एकत्र करायच्या. त्यामुळे दोघींनाही एकमेकींचा लळा लागला होता. अलीनाच्या लग्नानंतर काही दिवस कसेबसे गेले. पण बहिणीच्या आठवणीने ती व्याकूळ झाली. त्यावेळी तिने तिचं लग्न आपल्या नवऱ्याशी लावून देण्याचा निर्णय घेतला. ही घटना घडली आहे पाकिस्तानमधील मुल्तानमध्ये. या घटनेचा व्हिडिओ देखील पाकिस्तानी मीडियाने ट्वीटरवर शेअर केला आहे.
दुनिया न्यूजच्या बातमीनुसार, मुल्तानमधील फराज नावाच्या व्यक्तीचा दीड महिन्यापूर्वीच अलीना नावाच्या मुलीशी निकाह झाला. पण काही दिवसांपूर्वीच अलीनाने आपल्या चुलत बहिणीसोबत म्हणजे, अल्सिमासोबत फराजला दुसरा निकाह करायला लावला. आपल्या बहिणीला सोडून राहू शकत नसल्याने, तिने आपल्या नवऱ्यासोबतच अलिस्माचं लग्न लावल्याचं अलीनाने सांगितलं.या लग्नाबद्दल जेव्हा अलीनाला विचारण्यात आले तेव्हा तिने सांगितले की, माझे माझ्या बहीणीशिवाय येथे मन लागत नव्हते. मी आणि माझी चुलत बहीण अलिस्मा लहानपणापासून सोबत आहोत. आम्ही दोघी एकाच शाळेत शिकलो, प्रत्येक काम एकत्र केले. त्यामुळे एकमेकींची खूप सवय झाली आहे. लग्नानंतर तिच्याशिवाय माझे मन रमत नव्हते. नवऱ्यातही मन रमत नव्हते. काही आठवडे देखील मी कसेबसे काढले. मात्र त्यानंतर मी बहिणीला घरी बोलवले व माझ्या नवऱ्याशी तिचे लग्न लावून दिले. आता अलिस्मा माझी सवत असली तरी मला त्याचे दुःख नाही.
अलीनाने सांगितले की, आमच्या दोघींचे खूप पटते. तर अलिस्मा म्हणते की, मी माझ्या बहिणीपासून दूर राहून जिंवत राहू शकले नसते. या लग्नानंतर दोघीही खूप खूश आहेत. मात्र त्या दोघींच्या या निर्णयाने समाज त्यांचा शत्रू बनला आहे.
दरम्यान, या निर्णयामुळे अलीन आणि अलिस्मा दोघेही सुखात नांदत असल्या, तरी समाजातून त्यांना विरोध होत आहे. फराज आणि त्याच्या दोन्ही पत्नींना सातत्याने धमकावण्याचे प्रयत्न सुरु आहेत. अलिस्माच्या घरचे आता फराजला शोधत आहेत. कारण हा विवाह पचनी न पडल्याने फराजच्या जीवाला धोका असल्याचे काहीजणांचे म्हणणे आहे. तर दूसरीकडे सोशल मीडियावर या लग्नाची विविध प्रकारे खिल्ली उडवली जात आहे.