Indonesia Volcano: भारताच्या जवळच असलेल्या इंडोनेशिया देशातील माउंट लेवोटोबी लाकी येथे मोठा ज्वालामुखीचा उद्रेक झाला. त्यामुळे राखेचे आणि धुराचे इतके मोठे ढग निर्माण झाले की आकाशात १० किलोमीटरपर्यंत काहीही दिसत नव्हते. या ज्वालामुखीत एकामागून एक अनेक स्फोट झाले. त्यानंतर रेड अलर्ट जारी करण्यात आला. धुराच्या या लोटांमुळे अनेक विमान उड्डाणे वळवण्यात आली आहेत.
ज्वालामुखीतून निघणाऱ्या धुराचा अंदाज १५० किमी अंतरावरूनही येऊ शकत होता इतका स्फोट मोठा होता. ज्वालामुखीच्या उद्रेकानंतर, अनेक लोकांना गावांमधून बाहेर स्थलांतरित करण्यात आले आणि अनेक विमान उड्डाणांमध्ये बदल करण्यात आले. हल्लीच्या तरूणाईमध्ये हानिमून डेस्टिनेशन म्हणून लोकप्रिय असलेल्या बालीकडे जाणारी आणि येणारी विमाने यात समाविष्ट आहेत.
रेड अलर्ट जारी
ज्वालामुखीच्या उद्रेकानंतर प्रशासनाने रेड अलर्ट जारी केला आहे. ज्वालामुखीच्या आजूबाजूच्या ८ किमी पर्यंतचा परिसर धोकादायक असल्याचे सांगितले जात आहे. राखेतून लहान दगड उडून पडत आहेत. त्याशिवाय गावांमध्येही राखेचा ढिगारा पडला आहे. नुरबेलेन गावातील परिस्थिती इतकी वाईट आहे की अनेक लोकांना मदत छावण्यांमध्ये आश्रय घ्यावा लागत आहे.
ज्वालामुखीबद्दल...
माउंट लेवोटोबी लाकी इंडोनेशियातील फ्लोरेस तैमूर जिल्ह्यात आहे. ते माउंट लेवोटोबीच्या पेरुम्पुआनशी जोडलेले आहे. या ज्वालामुखीचा अनेक वेळा उद्रेक झाला आहे. नोव्हेंबरमध्येही त्याचा उद्रेक झाला होता, ज्यामध्ये ९ लोकांचा मृत्यू झाला होता आणि अनेक लोक जखमी झाले होते. त्यानंतर प्रशासनाने योग्य ती खबरदारी घेतली होती. त्यानंतर मार्चमध्ये हा ज्वालामुखी पुन्हा सक्रिय झाला.
अनेक उड्डाणांवर परिणाम
ज्वालामुखीच्या उद्रेकामुळे फ्रान्सिस्को झेवियर सेडा विमानतळ बंद राहिले. त्यामुळे अनेक आंतरराष्ट्रीय उड्डाणांवर परिणाम झाला. व्हर्जिन ऑस्ट्रेलिया, जेटस्टार आणि जुनेयाओ एअरलाइन्सच्या उड्डाणे रद्द करण्यात आली. तसेच बालीच्या आय गुश्ती नुग्रा राय आंतरराष्ट्रीय विमानतळावरचीही ३७ उड्डाणे रद्द करण्यात आली आहेत.