रशियाचे राष्ट्राध्यक्ष युक्रेन हातात येत नाहीय म्हणून त्रासलेले असताना आता ७० व्या वर्षी बाप बनणार असल्याच्या वृत्ताने पुरते हादरले आहेत. त्यांची कथित ३८ वर्षीय गर्लफ्रेंड अलीना कबाएवा पुन्हा गर्भवती राहिली आहे. माजी ऑलिंम्पिक जिम्नॅस्ट असलेल्या अलीनाला आधीच पुतीन यांच्यापासून झालेली दोन मुले आहेत. पुतीन यांना आणखी मुले नको होती, असा दावा काही रिपोर्टमध्ये करण्यात आला आहे.
रशियाचा न्यूज चॅनल जनरल एसवीआर टेलिग्रामने याबाबतचे वृत्त दिले आहे. अलीना पुन्हा गर्भवती असल्याचे म्हटले आहे. लाल चौकात विजय दिवसाच्या तयारीत असताना पुतीन यांना अलीना प्रेग्नंट असल्याचे कळविण्यात आल्याचे सूत्रांनी सांगितले. पुतीन यांनी पहिल्या पत्नीपासून घटस्फोट घेतला आहे. अलीना गर्भवती राहिल्याचे पुतीन यांना आवडलेले नाही. त्यांना आणखी एक मुल नको होते, यामुळे ते नाखूश असल्याचे सांगितले जात आहे.
अलीना आणि पुतीन यांच्याच संबंध असल्याचे पुतीन यांनी अद्याप स्वीकारलेले नाहीय. अलीना ही रशियाच्या एका मीडिया ग्रुपची सर्वेसर्वा आहे. ती सध्या स्वित्झरलँडमध्ये राहत असल्याचे सांगितले जात होते. एका वृत्तपत्राने केलेल्या दाव्यानुसार अलीनाला २०१५ मध्ये स्वित्झर्लंडमध्ये आणि २०१९ मध्ये मॉस्कोमध्ये दोन मुले झाली होती. युक्रेन युद्धामुळे अलीनावर अमेरिकेने निर्बंध लादल्याचे वृत्त आहे.
जिम्नॅस्टच्या खेळातून ती निवृत्त झाल्यावर राजकारणात आली होती. यानंतर ती पुतीन यांच्या युनायटेड रशिया पार्टीमधून खासदार झाली. अलीनाला गायिका व्हायचे होते, मात्र ती अपयशी ठरली. अलीना २००७ पासून वेगवेगळ्या महत्वाच्या पदांवरही राहिली आहे.