Iran Strike: इराणमध्ये सुरू असलेल्या युद्धाने आता निर्णायक वळण घेतले आहे. सर्वोच्च नेते आयतुल्ला अली खामनेई यांच्या मृत्यूनंतर, इराणचा नवा सुप्रीम लीडर निवडण्यासाठी जबाबदार असलेल्या असेम्बली ऑफ एक्सपर्ट्सच्या इमारतीवर इस्रायली हवाई दलाने मंगळवारी भीषण हल्ला केला. इराणच्या पवित्र कोम शहरात असलेल्या या इमारतीवर हा हल्ला झाला तेव्हा तिथे नवीन सर्वोच्च नेत्याच्या निवडीसाठी मतमोजणी सुरू होती.
निवड प्रक्रिया उधळून लावण्याचा प्रयत्न
इस्रायली संरक्षण दलाच्या एका अधिकाऱ्याने दिलेल्या माहितीनुसार, इराणला आपला नवीन सर्वोच्च नेता निवडण्यापासून रोखणे हा या हल्ल्याचा मुख्य उद्देश होता. ८८ सदस्यीय या परिषदेची इमारत पूर्णपणे उद्ध्वस्त झाली असून, ज्यावेळी हा हल्ला झाला, तेव्हा तिथे किती सदस्य उपस्थित होते आणि किती जीवितहानी झाली, याची अद्याप स्पष्ट माहिती मिळालेली नाही.
खामनेईंच्या मृत्यूनंतर निर्माण झालाय पेच
गेल्या शनिवारी अमेरिका आणि इस्रायलच्या संयुक्त हल्ल्यात आयतुल्ला अली खामनेई मारले गेले. इराणच्या संविधानातील कलम १११ नुसार, सर्वोच्च नेत्याचे पद रिक्त झाल्यानंतर असेम्बली ऑफ एक्सपर्ट्सला लवकरात लवकर उत्तराधिकारी नियुक्त करावा लागतो. यासाठी एका गुप्त समितीने उमेदवारांची यादीही तयार केली होती. मात्र, या निवडीवर शिक्कामोर्तब होण्यापूर्वीच इस्रायलने थेट निवडणूक प्रक्रियेच्या केंद्रावरच हल्ला करून इराणची शासन व्यवस्था धोक्यात आणली आहे.
तेहरानमध्ये पुन्हा स्फोटांचे आवाज
मंगळवारी सलग चौथ्या दिवशी अमेरिका आणि इस्रायलने तेहरानवर हल्ले सुरूच ठेवले. शहराच्या पूर्व आणि दक्षिण-पूर्व भागात प्रचंड स्फोट झाले असून, आकाशात राखाडी धुराचे लोट पाहायला मिळत आहेत. तस्निम आणि मेहर या इराणी वृत्तसंस्थांनी या स्फोटांची पुष्टी केली आहे. कोममधील धार्मिक आणि राजकीयदृष्ट्या महत्त्वाच्या इमारतींना लक्ष्य केल्याचे इराणी प्रसारमाध्यमांनी म्हटले आहे.
काय आहे 'असेम्बली ऑफ एक्सपर्ट्स'?
ही ८८ वरिष्ठ इस्लामिक विद्वानांची परिषद असून, सर्वोच्च नेत्याची निवड करणे, त्यांच्यावर देखरेख करणे आणि गरज पडल्यास त्यांना पदावरून हटवण्याचे एकमेव अधिकार या परिषदेकडे आहेत. इराणच्या इतिहासात यापूर्वी केवळ एकदाच (१९८९ मध्ये खोमेनींच्या मृत्यूनंतर) या परिषदेने नेतृत्व बदल पाहिला होता. त्यावेळी खामनेई यांची निवड झाली होती. खामनेईंच्या ३० वर्षांच्या काळात ही परिषद केवळ औपचारिक राहिली होती, मात्र आता देशाच्या अस्तित्वाचा प्रश्न असताना या परिषदेवर झालेला हल्ला इराणला नेतृत्वहीन करण्यासाठी केल्याचे बोलले जात आहे.
Web Summary : Amidst succession turmoil after Khamenei's death, Israel struck Iran's Assembly of Experts during leadership selection. The attack aimed to disrupt the process, devastating the building and potentially crippling Iran's governance. Tehran faces ongoing strikes.
Web Summary : खामनेई की मौत के बाद उत्तराधिकार संकट के बीच, इस्राइल ने नेतृत्व चुनाव के दौरान ईरान की असेम्बली ऑफ़ एक्सपर्ट्स पर हमला किया। हमले का उद्देश्य प्रक्रिया को बाधित करना, इमारत को नष्ट करना और संभावित रूप से ईरान के शासन को पंगु बनाना था। तेहरान हमलों का सामना कर रहा है।