Video - स्पेनमध्ये भीषण अपघात! २ हाय-स्पीड ट्रेनची जोरदार धडक; २१ जणांचा मृत्यू, अनेक जखमी

Spain Train Accident : कोर्डोबा प्रांतात दोन हाय-स्पीड ट्रेनची समोरासमोर धडक होऊन २१ लोकांचा मृत्यू झाला आहे, तर अनेक प्रवासी गंभीर जखमी झाले आहेत.

स्पेनमध्ये एक भीषण रेल्वे अपघात झाला आहे. कोर्डोबा प्रांतात दोन हाय-स्पीड ट्रेनची समोरासमोर धडक होऊन २१ लोकांचा मृत्यू झाला आहे, तर अनेक प्रवासी गंभीर जखमी झाले आहेत. 'एसोसिएटेड प्रेस'ने दिलेल्या माहितीनुसार, हा अपघात स्पेनमधील अलिकडच्या वर्षांतील सर्वात भीषण रेल्वे अपघातांपैकी एक मानला जात आहे.

स्पेनची रेल्वे संस्था ADIF च्या माहितीनुसार, हा अपघात कोर्डोबा येथील 'एडामुज' स्टेशनजवळ संध्याकाळी सुमारे ५:४० (GMT) वाजता झाला. प्राथमिक माहितीनुसार, मालागा येथून माद्रिदला जाणारी 'Iryo 6189' ही हाय-स्पीड ट्रेन अचानक रुळावरून घसरली आणि बाजूच्या ट्रॅकवर गेली. त्याच वेळी समोरून माद्रिदहून हुएल्वाकडे जाणाऱ्या ट्रेनची या गाडीशी जोरदार धडक झाली.

या धडकेनंतर दोन्ही ट्रेनचे डबे मोठ्या प्रमाणावर विखुरले गेले. अनेक डबे रुळावरून खाली घसरले, तर काही डबे एकमेकांवर गेले. अपघाताची भीषणता इतकी मोठी होती की, अडकलेल्या प्रवाशांना बाहेर काढण्यासाठी अवजड बचाव यंत्रसामग्रीची मदत घ्यावी लागली. या अपघातानंतर माद्रिद आणि अंडालूसिया दरम्यानची हाय-स्पीड रेल्वे सेवा तात्काळ प्रभावाने थांबवण्यात आली आहे. माद्रिद ते टोलेडो, सियुदाद रिअल आणि पुएर्तोलानो दरम्यान चालणारी व्यावसायिक रेल्वे सेवा सुरळीत सुरू आहे. 

'Iryo' ही एक खासगी हाय-स्पीड रेल्वे ऑपरेटर सेवा असून, तिचे संचालन इटालियन कंपनीद्वारे केले जाते. अंडालूसियाच्या आपत्कालीन सेवांनी सांगितले की, अपघातानंतर लगेचच सर्व रेल्वे वाहतूक रोखून मदत आणि बचाव कार्य सुरू करण्यात आले. घटनास्थळी अनेक रुग्णवाहिका, अग्निशमन दल आणि वैद्यकीय पथके रवाना करण्यात आली होती. जखमींना जवळच्या रुग्णालयात दाखल करण्यात आले आहे, मात्र जखमींची नेमकी संख्या किती याबाबत अद्याप कोणतीही अधिकृत माहिती समोर आलेली नाही.