शेतीच्या पाण्यात विक्रमी कपात

गेल्या चार वर्षांपासून दुष्काळात होरपळून निघत असलेल्या कॅलिफोर्निया प्रांताने शेतकऱ्यांना पाणी वापरात कपात करण्याचे आदेश दिले

वॉशिंग्टन : गेल्या चार वर्षांपासून दुष्काळात होरपळून निघत असलेल्या कॅलिफोर्निया प्रांताने शेतकऱ्यांना पाणी वापरात कपात करण्याचे आदेश दिले असून अमेरिकेच्या इतिहासातील ही सर्वात मोठी पाणी कपात आहे.
आपण पाणी उपशाचे अधिकार असलेल्या १०० जणांना तीन स्वतंत्र जलमार्गातील पाण्याचा उपसा थांबविण्याचे आदेश देणार आहोत, असे प्रांताच्या जल अधिकाऱ्यांनी शुक्रवारी जाहीर केले. यातील अनेक शेतकऱ्यांचे पाणी उपशाचे अधिकार १०० वर्षे जुने असून पाणी कपातीचा हजाराहून अधिक शेतकऱ्यांना फटका बसणार आहे.
सॅक्रामेन्टो, सान जोआक्विन व त्रिभूज पाणलोट क्षेत्रातील पाणी उपशाचे अधिकार असलेल्यांना या स्रोतातून पाणी घेणे थांबवावे लागणार आहे.
प्रशासनाने एक एप्रिलला शहरी पाणी वापरात २५ टक्के कपातीची घोषणा केली. तेव्हा शहरी नागरिकांनी लगेच ८० टक्के पाणी कृषीसाठी वापरले जात असल्याकडे लक्ष वेधले. त्यामुळे शहरी नागरिक विरुद्ध शेतकरी असे चित्र निर्माण झाले होते; मात्र शुक्रवारच्या आदेशाचा शेतकऱ्यांना फटका बसणार असल्याने हा असमतोल दूर झाल्याचे बोलले जाते. प्रो. लुंड यांना मात्र हा दृष्टिकोनच असंतुलित आणि अयोग्य वाटतो. गेल्या तीन वर्षांपासून कृषीची पाणी कपात सुरू आहे, तर दुष्काळाची झळ शहरवासियांना अलीकडे बसू लागली आहे, असे ते म्हणाले. (वृत्तसंस्था)


















हे आदेश आवश्यक व अपेक्षितच होते, असे कॅलिफोर्निया विद्यापीठातील स्थापत्य व पर्यावरण अभियांत्रिकीचे प्रोफेसर जे लुंड यांनी सांगितले. कॅलिफोर्नियात प्रचंड दुष्काळ पडलेला आहे. विशेषत: सान जोआक्विन खोऱ्याची स्थिती भयंकर आहे, असे ते म्हणाले. कॅलिफोर्नियात गेल्या चार वर्षांपासून दुष्काळी स्थिती असून १९७० नंतर प्रांत सरकारने यावर्षी प्रथमच पाणी उपशाचे अधिकार असलेल्यांना पाणी कपातीस भाग पाडले आहे.