पाकिस्तानच्या एमक्यूएम बंडखोरांना भारताची साथ ?

नवी दिल्ली, दि. २६ - पाकिस्तानमधील मुत्तहिदा कौमी मुव्हमेंटला (एमक्यूएम) भारताच्या गुप्तचर यंत्रणेने पाठबळ असून या पक्षातील बंडखोरांना भारताने शस्त्रास्त्र चालवण्याचे प्रशिक्षण दिल्याचा दावा केला जात आहे. भारतान या आरोपांमध्ये तथ्य नसल्याचे म्हटले असले पाकिस्तानने यासंदर्भात ब्रिटन पोलिसांकडून माहिती मागवली आहे. 

पाकिस्तानमधील मुत्ताहिदा कौमी मुव्हमेंट या राजकीय पक्षाच्या वरिष्ठ नेत्यांना ब्रिटन पोलिसांनी अटक केली होती. या दोघांची चौकशी दरम्यान भारतात प्रशिक्षण घेतल्याची व भारताकडून वेळोवेळी मदत मिळत असल्याची कबुली दिल्याचे वृत्त बीबीसी या आंतरराष्ट्रीय वाहिनीने दिले आहे. या वृत्तामुळे पाकिस्तानने भारताची कोंडी करण्याचे प्रयत्न सुरु केले आहेत. याप्रकरणी पाकच गृहमंत्री निसार अली खान यांनी ब्रिटनचे पाकमधील उच्चायुक्त फिलिप बार्टन यांची भेट घेत ब्रिटन पोलिसांकडून सविस्तर माहिती मागवण्याची विनंती केली. आम्ही यापूर्वीही मुत्तहिदांना भारताची साथ असल्याचे सांगितले होते, पण आता बीबीसीच्या वृत्ताने आमच्या दाव्यांना पाठबळ मिळाले आहे असे त्यांनी स्थानिक प्रसारमाध्यमांना सांगितले. तर भारत व एमक्यूएमच्या प्रवक्त्यांनी बीबीसीच्या वृत्तात तथ्य नसल्याचे म्हटले आहे. 

 

एमक्यूएम म्हणजे कराचीत राहणा-या मुजाहिर समाजाचे प्रतिनिधित्व करणारा पक्ष. मुहाजीर समुदाय हा फाळणीनंतर पाकमध्ये स्थलांतरित झाला. मात्र त्यांचे भारताशी अजूनही घट्ट नाते आहे. या समाजाला सिंध प्रातांत स्वतंत्र राज्य हवे आहे. यासाठी या पक्षातर्फे वेळोवेळी आंदोलन करण्यात आले होते. तसेच भारताने आम्हाला मदत करावी अशी जाहीर मागणी पक्षाचे अध्यक्ष अल्ताफ हुसैन यांनी काही महिन्यांपूर्वी केली होती. पाक सैन्याची नजर असलेल्या अल्ताफ हुसैन हे ब्रिटनमधून पक्ष चालवतात.