काबूल/इस्लामाबाद : पाकिस्तानच्या बलुचिस्तान-सिंध प्रांतात स्वातंत्र्य लढा पेटत चालला असताना अफगाणिस्तानशीही आता सीमावाद पेटला आहे. अफगाणच्या हेलमंद प्रांतात चगई जिल्ह्यालगत सीमेवर गेल्या काही महिन्यांपासून सुरू असलेला सशस्त्र संघर्ष शनिवारी अधिकच पेटला. तालिबानने या भागांत पाकिस्तानच्या अनेक लष्करी चौक्यांवर हल्ले केले. उखळी तोफांच्या माऱ्यात पाकच्या अनेक चौक्या उद्ध्वस्त झाल्या आहेत.
दरम्यान, अफगाण सीमेलगतच्या गावांत सुमारे अडीच लाख लोकांना घरे सोडून सुरक्षित स्थळी जाण्याचे आदेश तालिबानी सैनिकांनी दिले आहे. एकीकडे तालिबानने आव्हान दिले असताना बलुचिस्तान लिबिरेशन आर्मीने या प्रांतात स्वातंत्र्यलढा तीव्र करीत तालिबानला मदत करणे सुरू केले आहे. यामुळे पाकिस्तानी लष्कराची तीन आघाड्यांवर लढताना चांगलीच कोंडी झाली आहे. अफगाणिस्तानलगत काही चौक्या सोडून पाकिस्तानी लष्कराच्या जवानांनी पळ काढल्याचे अफगाण सूत्रांनी म्हटले आहे.
सिंधमध्ये नेत्यांचा पाकवर आरोप
या प्रांतात सुरू असलेल्या स्वातंत्र्याच्या आंदोलनावरून जनतेचे लक्ष विचलित करण्यासाठी पाकिस्तानी लष्करानेच पहेलगाम हल्ला केल्याचा दावा सिंधमधील बंडखोर नेत्यांनी जाहीरपणे केला. पाक लष्करप्रमुख बलुचिस्तानात जवानांसमोर भाषण देत असताना सोराब शहरावर बलएलएने ताब्यात घेतले. बलुचिस्तानात बीएलएच्या कारवाईत सहायक आयुक्ताचा मृत्यू. बीएलएने क्वेट्टा-कराची महामार्गावर वाहतुकीवर निर्बंध कडक केले.
बलुचिस्तान पेटले, सोराब शहरावर बंडखोरांचा ताबा
बलुची लिबिरेशन आर्मीने (बीएलए) पाकिस्तानी लष्कराला चकवा देत सोराब शहरावर पूर्ण ताबा मिळवला असून, या भागातील सर्व बँका, पोलिस ठाणी आणि सरकारी कार्यालयांवर ताबा मिळवल्याचा दावा बीएलएने शनिवारी केला. बीएलएचे प्रवक्ते जियांद बलूच यांनी माध्यमांना माहिती देताना सोराब शहरावर पूर्ण नियंत्रण मिळविल्याचे म्हटले आहे.
पाकच्या पंजाबमध्ये ३७ दहशतवादी अटकेत
लाहोर: पंजाबमध्ये सुरक्षा यंत्रणांनी ३४ दहशतवाद्यांना अटक केली आहे. हे दहशतवादी ‘तहरिक-ए-तालिबान’ या संघटनेचे असल्याचे दहशतवादविरोधी पथकाने म्हटले आहे. या कारवाईत मोठ्या प्रमाणात स्फोटके व दारूगोळा जप्त करण्यात आला आहे.