दुबईतील मरीना येथील ६७ मजली गगनचुंबी इमारतीला भीषण आग लागली होती. या इमारतीमधील ३८०० हून अधिक रहिवाशांना सुरक्षित स्थळी हलविण्यात आले असून या आगीत कोणीही जखमी किंवा जीवितहानी झालेली नसल्याचे अधिकाऱ्यांनी सांगितले.
टायगर टॉवर म्हणून ही इमारत ओळखली जात होती. शनिवारी पहाटे ही आग लागली. दुबई सिव्हिल डिफेन्स टीमने आग आटोक्यात आणण्यासाठी सहा तास प्रयत्न केले. या इमारतीमध्ये ७६४ अपार्टमेंट आहेत, त्यातील ३,८२० रहिवाशांना बाहेर काढण्यास यश आले, असे खलीज टाईम्सने दिलेल्या वृत्तात म्हटले आहे. एवढ्या मोठ्या इमारतीत आग लागल्याचे बहुतांश रहिवाशांना समजले देखील नाही, झोपेत असल्याने ते आग लागल्याच्या घटनेपासून अज्ञात होते. अग्निशमन दलाच्या जवानांनी इमारतीत जात सर्व रहिवाशांचे दरवाजे ठोठावले, बेल वाजविल्यावर सर्वांना समजत होते.
आगीवर नियंत्रण मिळविलेले असले तरी ती विझविण्याचे काम आताही सुरु असल्याचे अधिकाऱ्यांनी सांगितले. रहिवाशांसाठी तात्पुरत्या निवासाची व्यवस्था करण्यासाठी अधिकारी इमारतीच्या बिल्डरसोबत चर्चा करत आहेत. आगीचे कारण अद्याप समजलेले नाही. महत्वाचे म्हणजे या इमारतीला आग लागण्याची ही तिसरी वेळ आहे. यापूर्वी २०१५ मध्ये, ४७ व्या मजल्यावरील स्वयंपाकघरातील आग ४८ व्या मजल्यावर पसरली होती. तसेच २०१७ मध्येही या इमारतीत आग लागली होती.