"इस्रायलला किंमत चुकवावी लागेल" अली लारीजानींच्या हत्येनंतर इराणचा सूडाचा इशारा!

मध्य पूर्वेतील तणाव आता टोकाला पोहोचला असून इराणनेइस्रायलला गंभीर परिणाम भोगण्याचा इशारा दिला आहे. इराणच्या सर्वोच्च राष्ट्रीय सुरक्षा परिषदेचे सचिव अली लारीजानी यांच्या हत्येचा बदला घेतला जाईल आणि इस्रायलला याची मोठी किंमत चुकवावी लागेल, असे इराणचे सर्वोच्च नेते मोजतबा खामेनेई यांनी म्हटले. इस्रायलचे पंतप्रधान बेंजामिन नेतन्याहू यांनी मंगळवारी माहिती दिली आहे की, इराणवर सुरू असलेल्या हल्ल्यांदरम्यान इस्रायली फौजांनी अली लारीजानी यांना ठार केले. लारीजानी हे इराणच्या धोरणात्मक आणि सुरक्षा वर्तुळातील अत्यंत महत्त्वाचे व्यक्तिमत्व मानले जात होते. त्यांच्या मृत्युनंतर इराणमध्ये संतापाची लाट असून, मोजतबा खामेनेई यांनी या घटनेचा तीव्र निषेध केला आहे.

मोजतबा खामेनेई यांनी सोशल मीडियाच्या माध्यमातून लारीजानी यांना श्रद्धांजली वाहिली. ते म्हणाले की, "लारीजानी हे एक दूरदर्शी, बुद्धिमान आणि समर्पित विद्वान होते. त्यांच्यासारख्या व्यक्तीची हत्या ही इस्लामच्या शत्रूंचा त्यांच्याबद्दल असलेला द्वेष दर्शवते. गुन्हेगारांना याची किंमत मोजावी लागेल. अशा कृत्यांमुळे इस्लामिक राष्ट्राचा इरादा अधिक मजबूत होईल."

इराणच्या इस्लामिक रिव्होल्यूशनरी गार्ड कॉर्प्सने पुष्टी केली आहे की, अमेरिका-इस्रायलच्या संयुक्त हल्ल्यात बसीज स्वयंसेवक दलाचे प्रमुख घोलमरेझा सोलेमानी यांचाही मृत्यू झाला आहे. २८ फेब्रुवारीपासून इराणवर सुरू असलेल्या या हल्ल्यांमुळे दोन्ही देशांमधील संघर्ष आता थेट युद्धाच्या छायेत आहे. या हत्यांनंतर इराण आणि त्याच्या प्रादेशिक मित्रपक्षांनी मध्य पूर्वेतील अमेरिकन आणि इस्रायली तळांवर हल्ले तीव्र केले. होर्मुझची सामुद्रधुनी आणि ऊर्जा केंद्रांवर या संघर्षाचा परिणाम होत असल्याने जागतिक इंधन पुरवठा विस्कळीत होण्याची भीती निर्माण झाली.