तेहरान - इस्त्रायली हल्ल्यावेळी इराणच्या टॉप अधिकाऱ्याने इस्लामिक सेना बनवण्याची मागणी केली आहे. तुर्की, सौदी अरब, पाकिस्तानकडे इस्त्रायलविरोधात लढण्यासाठी इस्लामिक सेना बनवण्याचं आवाहन इराणने केले आहे. या प्रमुख इस्लामिक देशांसोबत इतर देशांनी इस्त्रायल विरुद्ध इराणची साथ देण्यासाठी इस्लामिक सेना बनवण्याची मागणी इस्लामिक रिवोल्यूशनरी गार्ड कॉर्प्सचे वरिष्ठ सैन्य अधिकारी मोहसेन रेजाई यांनी केली आहे.
रेजाई यांनी इराणी मीडियाला मुलाखत दिली आहे. त्यात ते म्हणाले की, तुर्की, सौदी अरब आणि पाकिस्तानसारख्या प्रमुख इस्लामी देशांनी एकत्र येऊन संयुक्त इस्लामिक सैन्य बनवायला हवे. ज्याचा हेतू इस्त्रायलविरोधात एकजूट दाखवणे आहे. सध्या सुरू असलेले युद्ध नियोजित संघर्ष आहे जो इस्लाम जगतात एकत्रितपणे जिंकले जाऊ शकते असं त्यांनी सांगितले आहे. हा प्रस्ताव अशावेळी पुढे आला आहे जेव्हा इराण-इस्त्रायल संघर्ष शिगेला पोहचला आहे. या प्रस्तावातून इराणची छुपी रणनीती पुढे आली आहे. मुस्लीम देशांना भावनात्मक एकत्र करून स्वत:ला संरक्षित करायचे आहे.
तुर्की, पाकिस्तानची इराणला साथ
इतकेच नाही तर पाकिस्तानने आम्हाला आश्वासन दिलंय की, जर इस्त्रायल इराणवर अणुहल्ला करेल तर ते इस्त्रायलवर अणुबॉम्ब टाकतील असा दावा रेजाई यांनी केला आहे. १४ जूनला देशाच्या संसदेत पाकिस्तानी संरक्षण मंत्री ख्वाजा आसिफ यांनी मुस्लीम देशांना इस्त्रायलविरोधात एकजूट होण्याचं आवाहन केले होते. इस्त्रायलने इराण, यमन आणि पॅलेस्टाईनला टार्गेट केले. जर मुस्लीम देश एकजूट झाले नाही तर प्रत्येकाची हीच अवस्था होईल. इस्लामिक सहयोग संघटनेनेन प्रत्युत्तर कारवाईसाठी संयुक्त रणनीती आखण्याची गरज असल्याचे पाकिस्तानने म्हटलं होते.
तुर्की आणि पाकिस्तान हे दोन्ही देश जगात प्रभावशाली सैन्य आणि आर्थिक ताकद असल्याचे मानले जाते. परंतु त्यांचे परराष्ट्र धोरण खूप गुंतागुतीचे आहे. तुर्की आणि सौदी अरब एकमेकांविरोधात असतात. तुर्कीने भलेही पॅलेस्टाईन समर्थनार्थ प्रतिक्रिया दिली असली तरी नाटो सदस्यता, इस्त्रायलसोबत सैन्य तंत्रज्ञान संबंध त्याला थेट युद्धात जाण्यापासून रोखतात. सौदी अरब अलीकडेच अमेरिकेच्या मध्यस्थीने इस्त्रायलसोबत संबंध प्रस्थापित करण्याच्या दिशेने पुढे जात आहे. त्यामुळे सौदी तूर्तास कुठलाही निर्णय घेत नाही. त्यामुळे या सर्व देशांनी एकत्रित येऊन सैन्य बनवणे प्रत्यक्षात कितपत खरे ठरेल हा प्रश्नच आहे.