पाकिस्तानचे माजी पंतप्रधान इम्रान खान यांनी तुरुंगातून एक अत्यंत गंभीर इशारा दिला आहे. बुधवारी त्यांनी आपल्या पक्षाच्या सदस्यांना सांगितले की, तुरुंगात त्यांच्यासोबत काहीही अघटित घडल्यास त्याचे एकमेव जबाबदार व्यक्ती सेनाप्रमुख फील्ड मार्शल असीम मुनीर असतील. ७२ वर्षीय, क्रिकेटपटू ते राजकारणी झालेले इम्रान खान ऑगस्ट २०२३ पासून अनेक प्रकरणांमध्ये तुरुंगात आहेत.
पाकिस्तान तहरीक-ए-इन्साफ (पीटीआय) पक्ष इम्रान खान यांना सोडण्यासाठी शहबाज शरीफ सरकार आणि सैन्य दलांवर दबाव टाकण्याच्या तयारीत आहे. यासाठी ५ ऑगस्टपासून देशभरात मोठे अभियान सुरू करण्याची योजना आहे.
इम्रान खान यांनी सोशल मीडिया मंच 'एक्स'वर एक पोस्ट करत म्हटले आहे, "गेल्या काही दिवसांपासून तुरुंगात माझ्यासोबत होणारे कठोर वर्तन अधिकच वाढले आहे. माझ्या पत्नी बुशरा बीबी यांच्याबाबतही असेच घडत आहे. त्यांच्या कोठडीतील टीव्हीही बंद करण्यात आला आहे. आम्हा दोघांचे सर्व मूलभूत अधिकार, मग ते मानवीय असोत किंवा कैद्यांना मिळालेले कायदेशीर अधिकार, निलंबित करण्यात आले आहेत."
पाकिस्तानचे माजी पंतप्रधान इम्रान खान यांनी म्हटले की, त्यांना माहीत आहे की एक कर्नल आणि तुरुंग अधीक्षक असीम मुनीर यांच्या आदेशानुसार काम करत आहेत. त्यामुळे मी माझ्या पक्षाला स्पष्ट निर्देश देतो की, जर तुरुंगात माझ्यासोबत काहीही झाले, तर त्याची जबाबदारी असीम मुनीर यांच्यावर असेल."
इम्रान खान यांनी आपला निर्धार व्यक्त करत म्हटले, "मी माझे संपूर्ण आयुष्य तुरुंगात घालवण्यासाठी तयार आहे, परंतु अत्याचार आणि दडपशाहीपुढे झुकण्याचा प्रश्नच उद्भवत नाही. पाकिस्तानच्या जनतेला माझा एकच संदेश आहे की, कोणत्याही परिस्थितीत या दमनकारी व्यवस्थेपुढे झुकू नका. संवादाची वेळ निघून गेली आहे. आता देशव्यापी आंदोलनाची वेळ आली आहे."
खुनी आणि दहशतवाद्यांनाही त्यांच्यापेक्षा चांगल्या स्थितीत ठेवले जाते, असे देखील त्यांनी म्हटले. त्यांनी एका सैन्य कर्मचाऱ्याचे नाव घेत म्हटले की, त्यालाही तुरुंगात व्हीआयपी सुविधा दिली जात आहे.
पंजाबच्या मुख्यमंत्री मरियम नवाज आणि केंद्रीय गृहमंत्री मोहसिन नकवी यांच्यावरही इम्रान खान यांनी टीका केली. गेल्या दोन वर्षांपासून या दोघांनी पंजाबच्या लोकांवर अत्याचार आणि हुकूमशाहीचे वातावरण निर्माण केले आहे, असे ते म्हणाले. इम्रान खान यांच्या बहिणी अलीमा खान यांनीही पत्रकारांशी बोलताना सांगितले की, इम्रान खान यांनी पीटीआयच्या सदस्यांना संदेश दिला आहे की, जर तुरुंगात त्यांच्यासोबत काहीही घडले, तर जनरल असीम मुनीर यांना त्यासाठी जबाबदार धरले जावे.