हाफिजच्या उलट्या बोंबा, २६/११ च्या मुंबई हल्ल्याचा केला निषेध

२६/११ च्या मुंबई हल्ल्याचा सूत्रधार असलेल्या हाफिज सईदने उलट्या बोंबा ठोकत मुंबई हल्ल्याचा निषेध दर्शवला आहे.

ऑनलाइन लोकमत 

इस्लामाबाद, दि. ३१ - २६/११ च्या मुंबई हल्ल्याचा सूत्रधार असलेल्या हाफिज सईदने उलट्या बोंबा ठोकत मुंबई हल्ल्याचा निषेध केला आहे. माझा या हल्ल्यात सहभाग नव्हताच व भारत माझ्याविरोधातील आरोप सिद्ध करु शकणार नाही असा दावाही हाफिजने केला आहे. 

हाफिज सईदने नुकतेच पाकिस्तानमधील वृत्तवाहिनीशी संवाद साधताना मुंबई हल्ल्याविषयी भाष्य केले. मुंबईत दहशतवादी हल्लासाठी भारताने माझ्यावर आरोप केले. मी त्यावेळी तातडीने स्थानिक प्रसारमाध्यमांशी संपर्क साधून या हल्ल्याशी संबंध नसल्याचे स्पष्टीकरण दिले होते. भारत माझ्यावरील आरोप सिद्ध करु शकणार नाही हे मी त्यावेळीही सांगितले व अजूनही भारत आरोप सिद्ध करु शकलेला नाही असे त्याने म्हटले आहे. 

भारताने हाफिज सईदविरोधात सर्व पुरावे पाकिस्तानकडे सुपूर्त केला आहे. मुंबईवर हल्ला करणारा अजमल कसाब व नुकतेच जम्मू काश्मीरमध्ये पकडले गेलेले सज्जाद अहमद व मोहम्मद नावेद या पाकिस्तानी दहशतवाद्यांनीही हाफिज सईदच्या दहशतवादी कारवायांमधील सहभागाविषयीची माहिती उघड केली आहे. मात्र त्यानंतरही हाफिज सईद पाकमध्ये मोकळा फिरत आहे.