पाकिस्तानी संसदेत खासदार मुजाहिद अली यांनी नकळत पाकिस्तानी सैन्य आणि आयएसआयचा बुरखा फाडला आहे. पडद्यामागे ISI आणि त्यांच्या जिहादी मानसिकतेवाले लोक जिहाद आणि गजवा ए हिंदला प्रोत्सहन देत असल्याचं पुढे आले. मुजाहिद अली यांनी उघडपणे संसदेत हिंदू, ईसाई, यहूदी यांच्या नरसंहाराचे समर्थन केले. खासदाराच्या या भाषणावर इतरांनी टाळ्या वाजवून त्यांना पाठिंबा दिला. गुरुवारी १९ जून रोजी पाकिस्तानी संसदेत खासदार मुजाहिद अली यांनी हे चिथावणीखोर भाषण केले. ज्यात त्यांनी गजवा ए हिंदचा उल्लेख केला. त्यांनी धार्मिक ग्रंथाचा हवाला देत हिंदू, यहुदी आणि ईसाईंना टार्गेट करण्याची भाषा केली.
मुजाहिद अली यांनी म्हटलं की, गैर मुसलमानांनी मुस्लिमांविरोधात फूट पाडा आणि राज्य करा असा फॉर्म्युला तयार केला आहे. ते सातत्याने हे काम करत आहेत. त्यात त्यांना यश मिळत आहे. परंतु आपल्या धार्मिक ग्रंथात इस्लाम धर्माचे रक्षण करण्यास सांगितले आहे. त्यासाठी मुस्लिमांची एक सभा खुरासान येथे होईल. जे इराणमधील एका शहराचे नाव आहे आणि अफगाणिस्तानाचेही जुने नाव आहे. तिथून काळी पगडी घालून लोक उठतील आणि धर्माचे रक्षण करतील. हदीसमध्येही याचे पुरावे आहेत. मुसलमान गैर मुस्लीम यहुदी आणि ईसाईंवर विजय मिळवतील असेही त्यांत सांगण्यात आल्याचे ते म्हणाले.
पाकिस्तान इस्लामी जगताचे मुख्यालय - मुजाहिद अली
पाकिस्तान इस्लामी जगताचे मुख्यालय आहे. इथे सर्वात चांगले कॅम्प आहे. ज्याप्रकारे आपल्या वायूसेनेने भारताला उत्तर दिले. ज्यारितीने पलटवार केला ते कौतुकास्पद होते. पण मी तुम्हाला एक गोष्ट सांगतो, ताकदीच्या बाबतीत आपली भारताशी कोणतीही स्पर्धा नाही, पण कलमाची ताकद अशी आहे की त्याचे वजन अणुबॉम्बपेक्षा जास्त आहे. जेव्हा आपले सैन्य शत्रूसमोर उभे राहते, तेही जेव्हा शत्रू हिंदू असतो, तेव्हा त्यांचा आत्मविश्वास काही वेगळाच असतो असं त्यांनी सांगितले.
दरम्यान, अलीकडेच पाकिस्तान सैन्याचे फिल्ड मार्शल असीम मुनीर यांनी अमेरिकेचे राष्ट्रपती डोनाल्ड ट्रम्प यांची व्हाईट हाऊसमध्ये भेट घेतली. ही भेट जवळपास २ तास चालली. या बैठकीत इराण-इस्त्रायल युद्धावर चर्चा करण्यात आली. त्यात इराणवर हल्ला करण्यासाठी अमेरिकन सैन्य दलाला पाकिस्तानातील एअरबेस वापरण्यास देण्यावर मुनीर यांनी सहमती दर्शवल्याचे बोलले जाते. इराण-इस्त्रायल यांच्यात संघर्ष शिगेला पोहचला असताना ही भेट झाल्याने अनेक चर्चांना उधाण आले आहे.