उत्तर कोरियात भीषण दुष्काळ

उत्तर कोरियात या शतकातील भीषण दुष्काळ पडला असून, आधीच अन्नधान्याचा तुटवडा सहन करणाऱ्या या देशात अन्नधान्य तुटवड्याची परिस्थिती

सेऊल : उत्तर कोरियात या शतकातील भीषण दुष्काळ पडला असून, आधीच अन्नधान्याचा तुटवडा सहन करणाऱ्या या देशात अन्नधान्य तुटवड्याची परिस्थिती अत्यंत गंभीर झाली आहे. या देशातील पाच वर्षांखालील प्रत्येक तिसरे मूल कुपोषित असल्याचे संयुक्त राष्ट्राने म्हटले आहे.
९० च्या दशकापासून उत्तर कोरियात दुष्काळ आहे. आंतरराष्ट्रीय मदतीवर कशीबशी गुजराण होत असताना अलीकडच्या काळात ही मदत जवळपास बंद झाली आहे. उत्तर कोरियाने मानवी हक्क कार्यकर्त्यांना देशात येण्यास बंदी घातलेली आहे. देशात चाललेले अन्नधान्याचे वितरण दाखविण्याची सरकारची तयारी नाही.
देशात पावसाचे प्रमाण अत्यल्प असून, त्यामुळे तांदळाचे पीक घेणारे ह्वानगी व फ्यानगान हे प्रांत कोरडे पडले आहेत. हा १०० वर्षातील भीषण दुष्काळ आहे, असे उत्तर कोरिया सरकारने म्हटले आहे. उत्तर कोरियातील कृषी क्षेत्राचे अपरिमित नुकसान झाले आहे. उत्तर कोरियात कधी पूर व कधी दुष्काळ यामुळे अन्नधान्याचे उत्पादन नेहमीच मार खाते. उत्तर कोरियात गेल्या वर्षी अत्यंत कमी पाऊस झाला होता. हे पावसाचे प्रमाण ३० वर्षात सर्वात कमी होते. गेल्या वर्षीचा दुष्काळ यावर्षी पावसाचा तुटवडा असल्याने अधिकच तीव्र झाला आहे.