"गेल्या ४० वर्षांपासून याच संधीची वाट पाहत होतो"; इराणवर पूर्ण ताकदीने हल्ला करण्याचे नेतन्याहूंचे आदेश

Benjamin Netanyahu: इराणचे सर्वोच्च नेते अयातुल्ला अली खामेनी यांच्या मृत्यूनंतर आता इराण-इस्रायल संघर्ष आणखी वाढण्याची शक्यता आहे. इस्रायलचे पंतप्रधान बेंजामिन नेतन्याहू यांनी यावरुन महत्त्वाचे विधान केले आहे. खामेनींचा अंत ही केवळ सुरुवात आहे, आता आम्ही तेहरानच्या हृदयावर घाला घालणार, अशा शब्दांत नेतन्याहू यांनी आपला फ्युचर प्लॅन जाहीर केला आहे. रविवारी सायंकाळी त्यांनी इराणमधील कट्टरपंथी राजवट मुळासकट उपटून टाकण्याचा निर्धार व्यक्त केला.

"आम्ही इराणच्या अत्याचाऱ्यांना सोडणार नाही"

देशाला संबोधित करताना नेतन्याहू म्हणाले, "काल आम्ही हुकूमशहा खामेनी आणि त्यांच्यासोबत डझनभर जालीम नेत्यांचा खात्मा केला. मी नुकतीच संरक्षण मंत्री, मोसादचे प्रमुख आणि लष्करी प्रमुखांसोबत बैठक घेतली आहे. मी स्पष्ट निर्देश दिले आहेत की, ही मोहीम थांबणार नाही, तर ती आणखी तीव्र होईल. इराणच्या कट्टरपंथी राजवटीला त्यांच्या प्रत्येक कर्माचा हिशोब द्यावा लागेल."

४० वर्षांचे स्वप्न होणार पूर्ण!

नेतन्याहू यांनी आपल्या मनातील एक जुनी इच्छा बोलून दाखवली. ते म्हणाले, "गेल्या ४० वर्षांपासून मला जे करायचे होते, ते करण्याची संधी आता मिळाली आहे. इराणमधील या दहशतवादी राजवटीवर थेट प्रहार करण्याचे माझे स्वप्न होते आणि मी तसे वचनही दिले होते. आता ते वचन पूर्ण करण्याची वेळ आली आहे."

अमेरिका आणि इस्रायलची युती

या मोहिमेत इस्रायलला अमेरिकेची खंबीर साथ मिळत असल्याचे नेतन्याहू यांनी सांगितले. "आम्ही आयडीएफची संपूर्ण ताकद पणाला लावली आहे. या युद्धात माझे मित्र अध्यक्ष डोनाल्ड ट्रम्प आणि अमेरिकन लष्कर आमच्या खांद्याला खांदा लावून उभे आहेत. ही शक्ती आम्हाला इराणचे अस्तित्व संपवण्यासाठी आणि आमचे भविष्य सुरक्षित करण्यासाठी मदत करेल," असेही त्यांनी स्पष्ट केले.

इस्रायली नागरिकांच्या मृत्यूवर व्यक्त केला शोक

युद्ध सुरू असतानाच इराणच्या प्रत्युत्तरार्थ झालेल्या हल्ल्यात तेल अवीव आणि बेत शेमेश येथे काही इस्रायली नागरिकांना प्राण गमवावे लागले आहेत. "हे दिवस वेदनादायी आहेत. आम्ही आमची माणसे गमावली आहेत, माझ्या सहवेदना त्या कुटुंबांसोबत आहे. जखमी नागरिकांच्या प्रकृतीत लवकर सुधारणा व्हावी, अशी मी प्रार्थना करतो," असे नेतन्याहू म्हणाले.