चारही बाजूंनी गोळीबार, मृत्यू समोर; तरी सुरक्षित पडला बाहेर; अमेरिकन पायलटचा थरारक अनुभव

America Iran War: अमेरिकेने बेपत्ता पायलटला शोधून काढण्यासाठी बचाव मोहीम आखली आणि यशस्वी करून दाखवली.

America Iran War: एकीकडे युद्धाची तीव्रता वाढत असताना इराणने अमेरिकेचे एक लढाऊ विमान (एफ-१५ इ स्ट्राइक ईगल) पाडल्यानंतर बेपत्ता असलेल्या वैमानिकाचा अमेरिकेने शोध सुरू केला आहे. या घटनेनंतर इराणने आपल्या नागरिकांना 'शत्रूचा वैमानिक' शोधून त्याला पोलिसांच्या हवाली करण्याचे आवाहन केले असून, १० अब्ज इराणी तोमान (सुमारे ५५ लाख रुपये) बक्षीस देण्याचेही आश्वासन दिले आहे. परंतु, अमेरिकन सैन्याने शत्रूच्या भूमीतून सुरक्षित बाहेर काढल्याचे म्हटले जात आहे. 

२४ तासांच्या अनिश्चिततेनंतर बेपत्ता झालेल्या पायलटला अमेरिकेने अखेर शोधून काढले. या मोहिमेने अमेरिकी सैन्य अशा प्रकारच्या कारवाया किती यशस्वीपणे पार पाडते, हे पुन्हा एकदा सिद्ध केले. राष्ट्राध्यक्ष ट्रम्प यांनी अमेरिकी सैन्याची प्रशंसा केली. सुटका केलेला वैमानिक सुरक्षित असून, त्याला इराणमधून सुखरूप बाहेर काढण्यात आले आहे, अशी माहिती एका अमेरिकन अधिकाऱ्याने दिली आहे. 

अमेरिकन पायलट बचाव मोहीम फत्ते

ही बचाव मोहीम एखाद्या चित्रपटाच्या कथानकाला शोभेल अशीच घडली. पायलटपर्यंत पोहोचण्यासाठी अमेरिकेच्या विशेष दलाच्या बचाव पथकांना शत्रूच्या भूमीवर जोरदार गोळीबाराचा सामना करावा लागला. सुटका करण्यात आलेला पायलट हा अमेरिकेच्या हवाई दलातील शस्त्र प्रणाली अधिकारी आहे. कुवैतवरून झेपावणाऱ्या अमेरिकन विमानाला इराणने लक्ष्य केले आणि ते कोसळले. याचे पायलट मात्र सुरक्षितपणे बाहेर पडण्यात यशस्वी झाले. यात एक पायलट सापडला, तर दुसरा बेपत्ता झाला होता.

दरम्यान, अमेरिकेचे अध्यक्ष डोनाल्ड ट्रम्प यांनी इराणविरोधात आपली भूमिका आणखी कठोर केली असून, ४८ तासांचा अल्टिमेटम दिला आहे. इराणकडे तडजोड करण्यासाठी किंवा होर्मुझची सामुद्रधुनी उघडण्यासाठी' फक्त दोन दिवस आहेत, अन्यथा 'महाभयंकर संकटा'ला सामोरे जावे लागेल, असा थेट इशारा ट्रम्प यांनी दिला.