बलुचिस्तान आता पाकिस्तानपासून वेगळा होण्याच्या उंबरठ्यावर आहे. बलुच लिबरेशन आर्मी पाकिस्तानी सैन्यावर एकावर एक तगडे हल्ले करत असून काही शहरांचा ताबा मिळविला आहे. एकीकडे एलओसीवर सैन्याची तैनाती, दुसरीकडे अफगानिस्तान सीमेवर युद्धाची स्थिती आणि बलुचिस्तान आणि सिंध प्रांतातील स्थानिकांचे उठाव यामुळे पाकिस्तानची चोहोबाजुंनी कोंडी झालेली आहे. सैन्य पाठवायचे तर पाठवायचे कुठे अशा कोड्यात पाकिस्तानी अधिकारी आहेत. अशातच बलुचिस्तानने आयएसआयचा महत्वाचा एजंट मारला आहे.
बलुचिस्तानमधील बंडखोर गट असलेल्या बलुच लिबरेशन आर्मी (बीएलए) च्या स्पेशल टॅक्टिकल ऑपरेशन स्क्वॉडने (एसटीओएस) क्वेटा येथे पाकिस्तानी सैन्याचा प्रमुख एजंट बाबुल मुहम्मद हसनी याला ठार केले आहे. त्याला त्याच्या गाडीसकट उडवून देण्यात आले आहे.
बलुच आर्मीनेही आपली गुप्तचर यंत्रणा उभारली आहे. "झिराब" ने दिलेल्या माहितीच्या आधारे ही कारवाई करण्यात आली. क्वेटामधील बरुरी रोडवरील एका स्टॉप एरियामध्ये हसनीच्या वाहनाला चुंबकीय आयईडी चिकटवला, हसनी गाडीत बसताच काही अंतरावर गेल्यावर स्फोट घडविण्यात आला. यात हसनीचा जागीच मृत्यू झाला तर त्याचा सहकारी गंभीर जखमी झाला आहे. या स्फोटात वाहनाचा पूर्ण चेंदामेंदा झाला आहे.
बाबुल मुहम्मद हसनी हा पाकिस्तानी सैन्य आणि त्यांच्या गुप्तचर संस्थांचा एक प्रमुख एजंट होता. जिहादी स्क्वॉड एजंट जकारिया मुहम्मद हसनीचा तो भाऊ होता. हसनीने एक छळ कक्ष देखील स्थापन केला होता, याद्वारे पाकिस्तानी एजंट बलुट तरुणांना गायब करायचे आणि त्यांचा छळ केला जात होता. त्याने कटाल भागात एक सशस्त्र टोळी उभी केली होती, जी शहर आणि गावांत दहशत माजवत होती. टोळीने अनेक भागात चौक्या उभारल्या होत्या. याद्वारे बलुच लोकांवर दहशत निर्माण केली जात होती. यांचा म्होरक्याच बलुच आर्मीने संपविला आहे.