अमेरिकेचे अध्यक्ष डोनाल्ड ट्रम्प यांच्या टॅरिफ धमकीला भारताने जोरदार प्रत्युत्तर दिले आहे. आरोप करणाऱ्या देशांनी प्रथम स्वतःकडे बघावे, असे भारताने म्हटले आहे. भारतीय परराष्ट्र मंत्रालयाचे प्रवक्ते रणधीर जैसल यांनी म्हटले की, युरोपियन युनियनचा रशियासोबत ६७.५ अब्ज युरोचा व्यापार असताना टीकाकारांना रशियासोबतच्या व्यापारात कशी अडचण येऊ शकते?
ट्रम्प यांनी पुन्हा एकदा भारताला टॅरिफची धमकी दिली आहे. अमेरिकेचे राष्ट्राध्यक्ष डोनाल्ड ट्रम्प यांनी म्हटले की, ते भारतावर टॅरिफ आणखी वाढवतील. ट्रम्प यांनी यापूर्वी २५ टक्के टॅरिफची घोषणा केली आहे. याशिवाय ट्रम्प यांनी असेही म्हटले आहे की, भारत स्वस्त तेल खरेदी करून रशियाला मदत करत आहे. यावर आता भारतीय परराष्ट्र मंत्रालयाने प्रतिक्रिया दिली आहे.
आरोप करणाऱ्या देशांनी प्रथम स्वतःकडे बघावे!परराष्ट्र मंत्रालयाने म्हटले आहे की, रशियाकडून तेल आयात केल्यामुळे भारत अमेरिका आणि युरोपियन युनियनच्या रडारवर आहे. खरं तर, युद्ध सुरू झाल्यानंतर तेलाचा पुरवठा युरोपकडे वळवण्यात आल्यामुळे भारताने रशियाकडून आयात करण्यास सुरुवात केली. त्यावेळी, जागतिक ऊर्जा बाजारपेठेची स्थिरता मजबूत करण्यासाठी अमेरिकेने भारताकडून अशा आयातीला सक्रियपणे प्रोत्साहन दिले.
मंत्रालयाने पुढे म्हटले आहे की, भारताच्या आयातीचा उद्देश भारतीय ग्राहकांना अपेक्षित आणि परवडणाऱ्या ऊर्जा खर्चाची खात्री करणे आहे. भारतावर टीका करणारे देश स्वतः रशियासोबत व्यापारात गुंतलेले आहेत.
रशियासोबत युरोपियन युनियनचा व्यापार!परराष्ट्र मंत्रालयाच्या प्रवक्त्याने सांगितले की, २०२४ मध्ये युरोपियन युनियनचा रशियासोबतचा द्विपक्षीय व्यापार ६७.५ अब्ज युरो होता. याशिवाय २०२३ मध्ये व्यापार १७.२ अब्ज युरो होता. हा त्या वर्षी किंवा पुढील वर्षी भारताच्या रशियासोबतच्या एकूण व्यापारापेक्षा खूपच जास्त आहे. २०२४ मध्ये युरोपियन एलएनजी आयात विक्रमी १६.५ दशलक्ष टनांवर पोहोचली, जी २०२२ मध्ये १५.२१ दशलक्ष टनांच्या मागील विक्रमाला मागे टाकते.
युरोप-रशिया व्यापार हा केवळ ऊर्जेबद्दल नाही, तर.. भारताने म्हटले आहे की, युरोप-रशिया व्यापारात केवळ ऊर्जाच नाही तर खते, खाण उत्पादने, रसायने, लोखंड आणि पोलाद, यंत्रसामग्री आणि वाहतूक यांचाही समावेश आहे. अमेरिकेचा विचार केला तर, ते त्यांच्या अणुउद्योगासाठी युरेनियम हेक्साफ्लोराइड, इलेक्ट्रिक वाहन उद्योगासाठी पॅलेडियम, खते आणि रसायने रशियाकडून आयात करत आहे. म्हणून, भारताला लक्ष्य करणे थांबवा, असे परराष्ट्र मंत्रालयाने म्हटले आहे. भारत त्यांच्या राष्ट्रीय हितांचे आणि आर्थिक सुरक्षेचे रक्षण करण्यासाठी आवश्यक असलेले सर्व उपाय करेल.