'ऑपरेशन खामेनी', ख्रिसमसला आखला कट, जिनेव्हात चर्चा फिसकटली अन् ६० सेकंदात इराणचं नेतृत्व संपलं!

अमेरिकन गुप्तचर यंत्रणेने खामेनी यांच्या सवयीला बनवलं मृत्यूचं हत्यार

Ayatollah Ali Khamenei: इराणचे सर्वोच्च नेते अयातुल्ला अली खामेनी यांचा खात्मा हा केवळ एक लष्करी हल्ला नव्हता. अमेरिका आणि इस्त्रायलने गेल्या अनेक महिन्यांपासून रचलेल्या एका अत्यंत गुंतागुंतीच्या कटातून हा हल्ला झाला. अमेरिकेची गु्प्तचर यंत्रणा सीआयएच्या गुप्त अहवालातून या मोहिमेचे धक्कादायक तपशील समोर आले आहेत. ५ मुख्य सूत्रधारांच्या साक्षीने समोर आलेली ही माहिती कोणत्याही हॉलिवूडपटापेक्षा कमी नाही.

फ्लोरिडामध्ये कटाची सुरुवात

या महाविनाशक मोहिमेची ठिणगी गेल्या वर्षी ख्रिसमसच्या सुमारास पडली. फ्लोरिडातील मार-ए-लागो इथे अमेरिकन राष्ट्राध्यक्ष डोनाल्ड ट्रम्प आणि इस्त्रायलचे पंतप्रधान बेंजामिन नेतन्याहू यांची एक गुप्त बैठक झाली. या बैठकीत नेतन्याहू यांनी इराणच्या अणू कार्यक्रमाचे पुरावे सादर केले. तिथेच ट्रम्प यांनी इराणच्या मिसाईल साईट्स नष्ट करण्यासाठी इस्त्रायलला पूर्ण पाठिंबा देण्याचे वचन दिले.

खामेनींचा 'डे-पॅटर्न' आणि सीआयएची नजर

सीआयए आणि इस्त्रायली गुप्तचर संस्थांनी खामेनी यांच्या दैनंदिन जीवनाचा सूक्ष्म अभ्यास केला होता. ते कोणाला भेटतात? कोणत्या मार्गाने प्रवास करतात?हल्ल्याची धमकी मिळाल्यास कुठे लपतात? या सर्व प्रश्नांची उत्तरे गुप्तचरांनी शोधून काढली होती. महत्त्वाचे म्हणजे, खामेनी हे रात्रीपेक्षा दिवसा स्वतःला अधिक सुरक्षित मानत असत. नेमकी हीच बाब त्यांच्या मृत्यूला कारणीभूत ठरली.

६० सेकंद अन् सगळं संपलं!

२६ फेब्रुवारीला जिनेव्हा येथे झालेली राजनैतिक चर्चा अपयशी ठरली आणि ट्रम्प यांनी लष्करी कारवाईच्या फाईलवर स्वाक्षरी केली. २८ फेब्रुवारीला तेहरानमधील एकाच कंपाउंडमध्ये खामेनी, राष्ट्रपती आणि वरिष्ठ सुरक्षा अधिकारी वेगवेगळ्या बैठकांसाठी जमले होते. ही इराणची सर्वात मोठी सुरक्षा चूक ठरली. पहाटेच्या ऐवजी दिवसा हल्ला करून इस्त्रायलने इराणला गाफील ठेवले. ६० सेकंदांच्या आत कंपाउंडमधील तीन वेगवेगळ्या ठिकाणांवर अचूक क्षेपणास्त्रे डागण्यात आली. यात खामेनी यांच्यासह रिव्होल्यूशनरी गार्ड्सचे प्रमुख आणि इतर ४० वरिष्ठ अधिकारी जागीच ठार झाले.

अमेरिकेची अवाढव्य तयारी

हा हल्ला करण्यापूर्वी अमेरिकेने मध्य-पूर्वेत आपली पूर्ण ताकद झोकून दिली होती. शेकडो लढाऊ विमाने, टँकर्स, युद्धनौका आणि पाणबुड्या इराणच्या दिशेने रवाना करण्यात आल्या होत्या. इराणने प्रत्युत्तर दिल्यास त्याचे परिणाम भोगण्यासाठी अमेरिका पूर्णतः सज्ज होती.