ओमानमध्ये भारतीय खलाशांच्या जहाजावर हल्ला; ऑईल टँकरवरील १५ भारतीयांचा जीव टांगणीला, ४ गंभीर जखमी

ओमानच्या किनारपट्टीवर तेलवाहू जहाजावर हल्ला झाल्याने खळबळ उडाली आहे.

Iran Israel US War: मिडल ईस्टमध्ये इस्रायल आणि इराण यांच्यातील संघर्ष आता टोकाच्या टप्प्यावर पोहोचला आहे. इराणचे सर्वोच्च नेते अली खामेनेई यांच्या निधनानंतर जगभरात तणाव वाढलेला असतानाच, रविवारी ओमानच्या किनारपट्टीजवळ एका तेलवाहू जहाजावर भीषण हल्ला झाला. महत्त्वाच्या मानल्या जाणाऱ्या स्ट्रेट ऑफ होर्मुजजवळ हा हल्ला झाला असून, यामध्ये १५ भारतीय खलाशांसह एकूण २० जण अडकले होते. या हल्ल्यात चार खलाशी गंभीर जखमी झाल्याची माहिती समोर येत आहे.

मिळालेल्या माहितीनुसार, स्कायलाईट नावाचे जहाज, ज्यावर पलाऊचा झेंडा होता ते ओमानच्या मुसंदम द्वीपकल्पाजवळून जात होते. ओमानच्या सागरी सुरक्षा केंद्राने दिलेल्या माहितीनुसार, खसाब बंदरापासून अवघ्या ५ सागरी मैलावर या जहाजाला लक्ष्य करण्यात आले. या जहाजावर एकूण २० क्रू मेंबर्स होते, ज्यामध्ये १५ भारतीय आणि ५ इराणी नागरिकांचा समावेश होता.

हल्ल्यानंतर तातडीने बचावकार्य राबवून सर्व खलाशांना सुरक्षित बाहेर काढण्यात आले असले तरी, चार जणांना गंभीर दुखापत झाली आहे. हा हल्ला नेमका कोणी आणि कोणत्या शस्त्राने केला, हे अद्याप स्पष्ट झालेले नाही. मात्र, अमेरिका आणि इस्रायलने इराणवर केलेल्या हल्ल्यानंतर इराणकडून सातत्याने धमक्या दिल्या जात होत्या.

'स्ट्रेट ऑफ होर्मुज' का आहे महत्त्वाचे?

ज्या ठिकाणी हा हल्ला झाला, तो स्ट्रेट ऑफ होर्मुज हा जगातील सर्वात महत्त्वाचा समुद्री मार्ग मानला जातो. जगातील एकूण तेल पुरवठ्यापैकी सुमारे २० टक्के तेल याच मार्गावरून जाते. इथून जाणाऱ्या एकूण तेलापैकी ८० टक्क्यांहून अधिक तेल आशियाई बाजारपेठेत येते. हा मार्ग केवळ ५० किलोमीटर रुंद असून इराण आणि ओमानच्या मध्ये आहे. इराणने या मार्गावर आपले नियंत्रण असल्याचा दावा वारंवार केला आहे.

इराणकडून समुद्री मार्ग रोखण्याचा इशारा

अमेरिकन आणि इस्रायली हल्ल्यांचा बदला म्हणून इराणच्या रिव्होल्यूशनरी गार्ड्सने रेडिओद्वारे या मार्गावरून जाणाऱ्या जहाजांना इशारा दिला आहे. इराणने अधिकृतपणे हा मार्ग बंद केला नसला तरी, येथून जाण्यास परवानगी नाही, असे मेसेज जहाजांना दिले जात आहेत. यामुळे आंतरराष्ट्रीय शिपिंग कंपन्यांनी या मार्गावरून जाणारी वाहतूक थांबवली असून विमा कंपन्यांनी वॉर-रिस्क प्रीमियममध्ये मोठी वाढ केली आहे.

जागतिक अर्थव्यवस्थेवर सावट

या हल्ल्यामुळे जागतिक ऊर्जा बाजारात खळबळ उडाली आहे. जर हा मार्ग पूर्णपणे बंद झाला, तर कच्च्या तेलाचे दर गगनाला भिडण्याची शक्यता आहे. इराणचा मित्र देश असलेला चीन आपल्या गरजेच्या ९० टक्के तेल इराणकडून याच मार्गाने आयात करतो, त्यामुळे चीनच्या भूमिकेकडेही जगाचे लक्ष लागले आहे.