बसस्थानकावर ताटकळत बसणे थांबेल; प्रत्येक बसचे कळणार ‘लाइव्ह लोकेशन’ !

हिंगोली : एस. टी. प्रवाशांच्या सुविधांसाठी प्रत्येक बसची लाइव्ह वेळ कळावी, यासाठी ‘व्हीटीएस’ सिस्टीम बसविण्यात येणार आहे. यासाठी विभागीयस्तरावर प्रयत्न सुरू असल्याची माहिती हिंगोली आगारप्रमुख पी. बी. चौतमल यांनी दिली.

हिंगोली आगारात सद्य:स्थितीत ६३ बस आहेत. सर्वच बसला ‘व्हीटीएस’ यंत्र बसविण्यात आले आहे. सध्या तरी विभागीयस्तरावर याची तपासणी करण्यात येत आहे. ही ‘व्हीटीएस’ मशीन चालकाच्या बाजूला बसविण्यात आलेली आहे. चालक-वाहकांचे लोकेशन, बसचे लोकेशन या ‘व्हीटीएस’ (व्हेकल ट्रॅकिंग सिस्टीम) पद्धतीमुळे समजणार आहे. हिंगोली आगारात ‘व्हीटीएस’करिता स्वतंत्र अशी खोली करण्यात आली असून त्या ठिकाणी संगणकही बसविण्यात आले आहे. या संगणावर सर्व माहिती सहजरीत्या उपलब्ध होऊ शकते. चालक-वाहकांचा डाटाही या संगणकात फीड करून ठेवण्यात आला आहे.

विभागीयस्तरावर सर्व नियंत्रण

हिंगोली आगारातील ६३ बसला व्हीटीएस बसविण्यात आले आहे; परंतु प्रवाशांसाठी ही सुविधा अजून उपलब्ध करून दिलेली नाही. अजून तरी या मशीनबाबत विभागीय स्तरावर तपासणी सुरू आहे. विभागीयस्तरावरून सूचना आल्यास मोठे स्क्रीनही बसस्थानकात लावले जातील. म्हणजे प्रवाशांना बस कुठे आहे, किती वेळात येईल, कुठे बिघडली आहे काय, याची माहिती कळू लागेल.

चालकांच्या निष्काळजीपणाला बसणार चाप

बसचे चालक कुठे थांबत आहेत, बस किती वेगाने चालवीत आहेत, कोणत्या थांब्यावर कितीवेळ थांबत आहेत? ही माहिती या व्हीटीएस मशीनद्वारे कळू शकणार आहे. याचबरोबर चालक-वाहकांना कुठेही थांबता येणार नाही. आगारातून दिलेली वेळ पाळून प्रवाशांची सेवा करावी लागणार आहे. कित्येक वेळा प्रवाशांच्या प्रश्नालाही उतरे द्यावी लागणार आहेत.

सध्या जिल्ह्यातील हिंगोली, कळमनुरी, वसमत या तिन्ही आगारांनी जवळपास सर्वच मार्गांवर बस सुरू केल्या आहेत; परंतु आजमितीस प्रवाशांना बसची वाट पाहावी लागत आहे. अशा वेळी चालक-वाहक वेगवेगळी कारणे देऊन प्रवाशांना निरुत्तर करतात. चालक-वाहक सांगतील तेच कारण प्रवाशांना मान्य करावे लागत आहे. येत्या काळात व्हीटीएस पद्धतीमुळे चालक-वाहकांना खोटे बोलता येणार नाही. व्हीटीएसमुळे बस कुठे आहेत, कोणत्या ठिकाणी किती वेळ थांबतात? याची माहिती कळणार आहे.

व्हीटीएस पद्धतीमुळे अनियंत्रित वेगाची नोंद होते. अनियंत्रित वेगही लवकर लक्षात येतो. वाहन परीक्षक विभागात इंटरनेट कनेक्शन दिले आहे. या विभागात सर्व चालक-वाहकांची नोंदही करून ठेवली आहे. लवकरच व्हीटीएस पद्धत प्रवाशांना कळविली जाणार आहे.

-पी. बी. चौतमल, आगारप्रमुख