दोन वर्षांत एसटीच्या उत्पान्नात साठ टक्क्यांनी घट

हिंगोली: उत्पन्नाच्या बाबतीत पुढे असलेल्या एसटी महामंडळाला कोरोना काळात मोठ्या प्रमाणात फटका बसला असून कोट्यवधींचे उत्पन्न चक्क लाखावर येऊन पोहोचले. कोरोना महामारीमुळे एसटी महामंडळाच्या हिंगोली आगारात साठ टक्क्यांनी घट झाली. चाळीस टक्क्यांवरच महामंडळाला समाधान मानावे लागत असल्याचे पाहावयास मिळत आहे.

२०२० मधील मार्च महिन्याच्या २३ तारखेपासून कोरोना महामारीने डोके वर काढले होते. मार्च ते जुलै अशी पाच महिने एसटी महामंडळाला चक्क सर्वच बसेस बंद ठेवाव्या लागल्या होत्या. त्यानंतर जुलै महिन्यात शेवटी-शेवटी शासनाने माल वाहतुकीसाठी एसटी महामंडळाला परवानगी दिली होती. परंतु, त्यास म्हणावा तसा प्रतिसाद मिळाला नाही. हिंगोली जिल्हा होऊन आजमितीस २३ वर्षे झाली असून सद्य:स्थितीत जिल्ह्यात हिंगोली, वसमत आणि कळमनुरी ही तीनच आगार आहेत. सद्य:स्थितीत कोरोनाचे रुग्ण कमी झाले नसल्यामुळे प्रवासी प्रवास करण्यास मागेपुढे पाहत आहेत.

हिंगोली आगाराला २०१९ मध्ये जानेवारी महिन्यात १ कोटी ४५ लाख, फेब्रुवारी १ कोटी ३५ लाख, मार्च १ कोटी ४८ लाख, एप्रिल १ कोटी ८७ लाख, मे २ कोटी १३ लाख, जून १ कोटी ७६ लाख, जुलै १ कोटी ३८ लाख, ऑगस्ट १ कोटी ४० लाख, सप्टेंबर १ कोटी ३७ लाख, ऑक्टोबर १ कोटी ६० लाख, नोव्हेंबर १ कोटी ६७ लाख, डिसेंबर १ कोटी ४२ लाखांचे उत्पन्न झाले. २०२० मध्ये जानेवारी महिन्यात १ कोटी ३९ लाख, फेब्रुवारी १ कोटी ५६ लाख, मार्च ६ लाख, एप्रिल (निरंक), मे ५ लाख, जून ३ लाख, जुलै २ लाख, ऑगस्ट १५ लाख, सप्टेंबर २६ लाख, ऑक्टोबर ९५ लाख, नोव्हेंबर १ कोटी ५३ लाख आणि डिसेंबर महिन्यात १ कोटी ४१ लाख रुपयांचे उत्पन्न झाले. २०२० मध्ये मार्च ते ऑक्टोबर या सात महिन्यात हिंगोली आगाराचे उत्पन्न लाखावर येऊन ठेपले होेते. यामध्ये एप्रिल महिना तर निरंक राहिला गेला.

प्रतिक्रिया

कोरोनाने मागील काही दिवसांपासून डोके वर काढले आहे. त्यामुळे उत्पन्नात घट होणे साहजिकच आहे. उत्पन्न वाढीसाठी चालक, वाहक आणि कर्मचारी सर्वजण प्रयत्न करत आहेत.

- संजयकुमार पुंडगे, स्थानकप्रमुख, हिंगोली