साहित्यसम्राट अण्णाभाऊ साठे व्याख्यानमालेचे आयोजन

सेनगाव : साहित्यसम्राट लोकशाहीर अण्णाभाऊ साठे यांचे जन्मशताब्दी वर्षाचे औचित्य साधून लहुजी साळवे कर्मचारी महासंघ महाराष्ट्र राज्य शाखा हिंगोलीच्या वतीने ३० जानेवारी रोजी सकाळी ११ वाजून ३० मिनिटांनी साहित्यसम्राट अण्णाभाऊ साठे व्याख्यानमाला व गुणवंतांच्या सत्काराचे आयोजन करण्यात आले आहे. या एक दिवसीय व्याख्यानमालेचे पुष्प प्रसिद्ध विचारवंत व व्याख्याते प्रा. डॉ. मच्छिंद्र सकटे कोल्हापूरकर हे गुंफणार असून ते राष्ट्रनिर्माण कार्यात डॉक्टर अण्णाभाऊ साठे यांचे योगदान या विषयावर उपस्थित समाज बांधवांना मार्गदर्शन करणार आहेत.

हिंगोली जिल्हा लहुजी साळवे कर्मचारी महासंघ महाराष्ट्र राज्याच्या वतीने मागील २००७ पासून जिल्ह्यात लोकशाहीर अण्णाभाऊ साठे व्याख्यानमालेचे आयोजन केले जात आहे. गेल्या १४ वर्षांपासून या व्याख्यानमालेचा उगम जिल्ह्यात झाला असून महापुरुषांची असलेली विचारधारा तळागाळातील सर्वसामान्य माणसापर्यंत पोहोचवावी व त्या विचारांचा अंमल व्हावा या हेतूने क्रांतिवीर लहुजी साळवे कर्मचारी महासंघ यांनी समाजातील परिवर्तनवादी विचाराच्या लोकांच्या सहकार्याने जिल्ह्यात असाच एक वैचारिक विचारमंच निर्माण व्हावा या सर्वांच्या प्रयत्नातून साहित्यसम्राट लोकशाहीर अण्णाभाऊ साठे व्याख्यानमालेचे आयोजन दरवर्षीप्रमाणे या वर्षी केले आहे. ही व्याख्यानमाला ३० जानेवारी रोजी सकाळी ११ वाजून ३० मिनिटांनी शहरातील महावीर भवन रामलीला मैदान येथे आयोजित करण्यात आली आहे. या एक दिवसीय साहित्यसम्राट लोकशाहीर अण्णाभाऊ साठे व्याख्यानमालेचे पुष्प प्रसिद्ध विचारवंत तथा व्याख्याते प्रा. डॉ. मच्छिंद्र सकटे कोल्हापूरकर हे गुंफणार असून राष्ट्रनिर्माण कार्यात डॉक्टर अण्णाभाऊ साठे यांचे योगदान या विषयावर ते आपले विचार मांडणार आहेत. या वेळी अध्यक्ष म्हणून सेवानिवृत्त जिल्हा व सत्र न्यायाधीश पी.ए. खिल्लारे, उद्घाटक आमदार रावसाहेब अंतापूरकर देगलूर विधानसभा, प्रमुख अतिथी बालाजी थोटवे प्रदेशाध्यक्ष लहुजी साळवे कर्मचारी महासंघ महाराष्ट्र राज्य, हिंगोली येथील प्रसिद्ध हृदयरोगतज्ज्ञ तथा समाजभूषण डॉ. अमोल धुमाळ, उपकोषागार अधिकारी दीपक गवलवाड यांची प्रमुख उपस्थिती राहणार आहे. या साहित्यसम्राट अण्णाभाऊ साठे व्याख्यानमाला व गुणवंतांचा सत्कार आयोजनकामी जिल्हाध्यक्ष प्रेमकुमार सोनवणे, उपाध्यक्ष हरिभाऊ सोनवणे, आत्माराम गायकवाड, रामानंद आठवले, श्रावण मंडलिक, एन. उबाळे, सचिन आठवले, जे.पी. खंदारे, बी.आर. गाडे, एस.वाय. चव्हाण, बी.बी. लांडगे, बी.एल. खंदारे, एस.एस. पाटोडे, आर.के. वैरागड सह पदाधिकारी लहुजी साळवे कर्मचारी महासंघ महाराष्ट्र राज्य व समाज बांधवांकडून करण्यात आले आहे.