३.२ रिश्टर स्केलची नोंद
कुरुंदा (जि. हिंगोली) : वसमत तालुक्यातील पांगरा (शिंदे) येथे सलग दोन वर्षांपासून भूगर्भातून गूढ आवाज होण्याचा प्रकार नित्याचाच झाला आहे. त्यावर संशोधन होणे आवश्यक आहे. नेहमीचा प्रकार म्हणून त्याकडे दुर्लक्ष केले जात आहे. शनिवारी दिवसा ४ वाजून ९ मिनिटांनी तर रविवारी पहाटे १२.४१ वाजता भूकंपाचे सौम्य धक्के जाणवले. या भूकंपाची तीव्रता ३.२ अशी रिश्टर स्केल एवढी झाली आहे.
पांगरा (शिंदे) या गावाची लोकसंख्या ७ हजारांच्या जवळपास आहे. या ठिकाणी सतत भूगर्भातून गूढ आवाज निर्माण होतो. त्यामुळे पांगरा (शिंदे)सह परिसरातील वापटी, कुपटी, शिरळी, राजवाडी या गावांना त्याचा हादरा बसतो. गेल्या दोन वर्षांपासून रात्री-बेरात्री गूढ आवाज होण्याचे प्रकार नित्याचे झालेले आहेत. त्यामुळे या गावातील नागरिक भीतीच्या वातावरणात वावरत आहेत. आवाजाचे संशोधन लावण्याची मागणी ग्रामस्थांनी गेल्या वर्षी प्रशासनाकडे केली होती. अचानकपणे धमाका झाल्यासारखा आवाज निर्माण होऊन जमीन हादरते. त्यामुळे १ ते २ सेकंद जमीन हलते. त्या प्रकारामुळे भीती निर्माण होत आहे अशी संतोष शिंदे यांनी प्रतिक्रिया व्यक्त केली.
पांगरा (शिंदे) येथे पाहणीसाठी मंडळ अधिकाऱ्यांना पाठविण्यात आले. सतत होणाऱ्या गूढ आवाजाचा अहवाल जिल्हाधिकाऱ्यांकडे पाठविण्यात येणार असून संशोधनाचा निर्णय वरिष्ठ पातळीवर होत असतो. असे वसमतचे तहसीलदार अरविंद बोळगे यांनी सांगितले.
नेमका हा प्रकार काय आहे. अचानकपणे आवाज येऊन जमीन हादरत असते. याचे कारण शोधण्याची गरज असल्याचे मत माजी सरपंच भगवान शिंदे यांनी व्यक्त केले. गूढ आवाजामुळे गावात एका प्रकारे भीती पसरलेली असून गावकऱ्यांना दिलासा देण्यासाठी प्रशासनाने त्यावर संशोधन करून गावकऱ्यांना त्याची माहिती दिली पाहिजे, असे मत तंटामुक्त समितीचे अध्यक्ष पंजाबराव शिंदे यांनी व्यक्त केले.