आखाडा बाळापूर ( हिंगोली) : अनैतिक संबंधापासून रोखण्याचा प्रयत्न करणाऱ्या पतीचा पत्नी आणि तिच्या प्रियकराने काटा काढल्याची घटना आखाडा बाळापूर येथे घडली आहे. याप्रकरणी पत्नी व प्रियकराविरुद्ध बाळापुर पोलीस ठाण्यात खुनाचा गुन्हा दाखल झाला आहे.
पोलीस सूत्रांनी दिलेल्या माहितीनुसार, आखाडा बाळापूर येथील शेख शकील शेख खाजा (वय 35 वर्ष ) याचा मृतदेह मंगळवारी रात्री साडेबारा वाजण्याच्या सुमारास बायपास रोडच्या कडेला आढळून आला होता. ठाणेदार पंढरीनाथ बोधनापोड, जमादार नागोराव बाभळे, चव्हाण रात्रीच घटनास्थळी पोहोचले. मृतदेहाची माहिती नातेवाईकांना देऊन ओळख पटविण्यात आली. आज शवविच्छेदन करण्यात आले. यात खून झाल्याचे पुढे आले.
दरम्यान, मयत शेख शकील याची बहीण यास्मिन शेख वसीम हिने आज बाळापूर पोलीस ठाण्यात येऊन तक्रार दिली. तक्रारीनुसार मयत शकील याची पत्नी फुलमा हिचे व डोंगरकडा येथील इसम मोहसीन याचे अनैतिक संबंध होते. यापूर्वी देखील शकीलला मोहसीनने मारहाण केली होती. त्यावेळी पत्नीने पोलिसात तक्रार देऊ दिली नाही. त्यानंतर फुलमा व शकील हे अर्धापूर येथे राहावयास गेले. काल सकाळी शकील आईला भेटण्यासाठी बाळापूर येथे आला होता. त्यानंतर रात्री शकीलचा खून झाला. पत्नी आणि प्रियकराच्यामध्ये अडथळा ठरत असल्यानेच माझ्या भावाचा खून केला असल्याची तक्रार बहिणीने दिली आहे. त्यानुसार यास्मिन शेख हिच्या तक्रारीवरून मयताची पत्नी फुलमा शेख शकील ( रा. आखाडा बाळापुर,ह.मु. अर्धापूर) व तिचा प्रियकर मोहसीन (राहणार डोंगरकडा )यांचे विरुद्ध भारतीय दंडविधानाच्या कलम 302 , 34 अन्वये गुन्हा दाखल करण्यात आला आहे . या प्रकरणाचा पुढील तपास ठाणेदार पंढरीनाथ बोधनापोड करीत आहेत.