पैशाच्या कारणावरून दोन गटात हाणामारी

नरसी नामदेव : पैशाच्या कारणावरून दोन गटात हाणामारी झाल्याची घटना नरसी नामदेव येथे १ एप्रिल रोजी सायंकाळी ७ वाजेच्या सुमारास घडली. याप्रकरणी १७ जणांवर परस्परविरोधी नरसी पोलीस ठाण्यात गुन्हा नोंद झाला आहे.

याबाबत पहिली फिर्याद शिवाजी बाबाराव पातळे (रा. धनगरगल्ली, नरसी) यांनी दिली आहे. शिवाजी पातळे यांचा भाऊ शेषराव पातळे यांनी व्याजाने घेतलेले पैसे का देत नाहीस या कारणावरून नरसी येथील नऊ जणांनी घरात प्रवेश केला. त्यानंतर घरातील संसारोपयोगी साहित्य रस्त्यावर फेकून दिले. शिवाजी पातळे यांच्या भावजयीच्या गळ्यातील ३५ हजार रुपये किमतीची १० ग्रॅम सोन्याची पोत, आईच्या गळ्यातील २२ हजार रुपये किमतीची सोन्याची गहू मण्यांची पोत, ५२ हजार रुपये किमतीचे ८० तोळे चांदीचे दागिने असा एकूण एक लाख नऊ हजार रुपये किमतीचा मुद्देमाल चाकूचा धाक दाखवून चोरून नेला. तसेच दरवाजा तोडून खिडकीच्या काचा फोडत मोबाइलवरून जीवे मारण्याची धमकी दिली. तसेच आरोपींनी जिल्हाधिकाऱ्यांच्या आदेशाचे उल्लंघन केल्याचे फिर्यादीत म्हटले आहे. याप्रकरणी शिवाजी पातळे यांच्या फिर्यादीवरून

अरुणा दिलीप काळे, अशोक कठाळू काळे, अशोक काळे यांची पत्नी, मंगळ पांडुरंग काळे यांची पत्नी, दत्ता रामजी पातळे, रामजी उकंडी पातळे, मंजुळा रामजी पातळे, दिलीप कठाळू काळे, मंगल पांडुरंग काळे यांच्याविरुद्ध गुन्हा नोंद झाला आहे. दुसरी फिर्याद अरूणाबाई दिलीप काळे यांनी दिली. शेषराव पातळे यांना ट्रॅक्टर दुरूस्तीसाठी १ लाख ७ हजार रूपये किमतीचे सोन्या चांदीचे दागिने हात उसने दिले होते. त्यापैकी ३६ हजार रूपये परत दिले. उर्वरित पैसे देण्याच्या निमित्ताने आरोपींनी घरी बोलावून काठीने मारहाण केली. तसेच अरूणाबाई काळे हिची मुलगी आरती काळे हिच्या दंडास चावा घेऊन जखमी केले. जातीवाचक शिवीगाळ करून आरोपींनी जिल्हाधिकाऱ्यांच्या आदेशाचे उल्लंघन केल्याचे फिर्यादीत म्हटले आहे. अरूणाबाई काळे यांच्या फिर्यादीवरून शिवाजी पातळे, संतोष पातळे, शेषराव पातळे, बाबाराव पातळे, शेषराव पातळे यांची पत्नी, शिवाजी पातळे यांची पत्नी, संताेष पातळे यांची पत्नी, लताबाई पातळे अशा आठ जणांवर गुन्हा नोंद झाला आहे.

दरम्यान, उपविभागीय पोलीस अधिकारी विवेकानंद वाखारे, सपोनि गिरी यांनी घटनास्थळी भेट देऊन माहिती घेतली. तपास उपविभागीय पोलीस अधिकारी विवेकानंद वाखारे, सपोनि गिरी करीत आहेत.